Dermatitis herpetiformis

Dermatitis herpetiformis (angl. Duhring's disease, Sëmundja Duhring) është një sëmundje kronike, me kruajtje të shumta, e shoqëruar me flluska. Dermatitis Duhring i takon sëmundjeve të lëkurës, që krijojnë flluska. Kjo sëmundje është e lidhur me ndjeshmërinë e zorrëve ndaj glutenit (Coliac sprue).

Shkaktarët e sëmundjes

Shkaktarët e sëmundjes akoma nuk dihen.

Epidemiologjia

Kjo sëmundje shfaqet prej moshës 20 deri në atë 60 vjeçare. Shpërndarja te gjinitë meshkuj:femra është 2:1. Zakonisht fillon rreth moshës 30 deri 40 vjeçare, por shfaqet edhe te fëmijët.

Simptomat dhe klinika

Fillon me kruajtje ekstreme. Flluskat shfaqen në lëkurë rreth bërrylave dhe gjunjëve, në kurriz, prapanicë dhe kokë. Ato kanë formë të njëjtë dhe shfaqen në të dy anët e trupit. Shpesh flluskat duken si flluskat e urtikaries dhe janë të mbushura edhe me gjak. Simptomat janë të ndryshueshme, herë ato tentojnë të përmirësohen, hera të tjera ata keqësohen.

Diagnoza

Biopsi të lëkurës dhe pastaj nëpërmjet të imunofluorescencës direkte vërtetohen antitrupat IgA të grumbulluara në formë lineare në lëkurë.

Terapia

Dapsone (tuberkulostatikë) dhe një antibiotik u ndihmon në të shumtën e rasteve pacientëve.

Prognoza

Kjo sëmundje mund të kontrollohet me mjekim, por nuk është plotësisht e shërueshme.

Komplikimet

Te shumë pacientë me sëmundjen Duhring gjinden gjithashtu edhe sëmundje të gjëndrës tiroide. Ato gjithashtu zhvillojnë shpesh kancer të traktit intestinal.

Parandalimi

Për këtë sëmundje nuk është akoma e njohur ndonjë metodë për parandalimin e saj. Pacientët me këtë sëmundje bëjnë mirë nëse i shmangin prodhimet e grurit (të gjitha ato që përmbajnë gluten) për tu shmangur komplikimeve të sëmundjes.