Arta Rama-Hajrizi

Nga Wikipedia, enciklopedia e lirë
Jump to navigation Jump to search

Arta Rama-Hajrizi është zgjedhur kryetare e Gjykatës Kushtetuese të Republikës së Kosovës më 21 maj 2015 dhe rizgjedhur për një mandat të dytë më 22 maj 2018. Gjithashtu, ajo është asistente e lartë e të Drejtës Kushtetuese në Fakultetin Juridik të Universitetit të Prishtinës.[1]

Rama-Hajrizi, më 12 shtator 2014, është emëruar zëvendësanëtare e Komisionit të Venecias për të përfaqësuar Republikën e Kosovës.[2]

Deri në emërimin e saj gjyqtare në Gjykatën Kushtetuese, në vitin 2012, kryetarja Rama-Hajrizi, ka qenë pjesë e grupit të parë të të emëruarve në shërbimin e jashtëm të Republikës së Kosovës në vitin 2008, ku është emëruar Konsulle e parë e Përgjithshme dhe themeluese e Konsullatës së Përgjithshme të Republikës së Kosovës në Nju-Jork, në të cilën cilësi shërbeu në vitet 2008-2012.[2]

Gjatë viteve 2007-2008, ajo ishte pjesë e ekipit të ekspertëve në Komisionin për Hartimin e Kushtetutës së Republikës së Kosovës dhe të Ligjit për Gjykatë Kushtetuese. Kryetarja Rama-Hajrizi, po ashtu, ka punuar në disa projekte të USAID-it në Kosovë për reformimin e sistemit të drejtësisë dhe të sistemit gjyqësor në Republikën e Kosovës. Po ashtu, ajo ka qenë këshilltare ligjore në Dhomën e Posaçme të Gjykatës Supreme të Republikës së Kosovës nëpërmjet financimit nga USAID-i.[2]

Kryetarja Rama-Hajrizi ka punuar si eksperte në zbatimin e shumë projekteve për ngritjen e vetëdijesimit për respektimin dhe për mbrojtjen e të drejtave dhe të lirive të njeriut në Kosovë, nëpërmjet Finnish Human Rights Programme për disa vjet me radhë.[2]

Kryetarja Rama-Hajrizi ka publikuar disa punime shkencore dhe hulumtime profesionale në kuadër të projekteve të ndryshme brenda dhe jashtë vendit, si dhe ka zhvilluar vizita të shumta studimore e profesionale, me qëllim të ngritjes profesionale.[2]

Studimet për drejtësi, kryetarja Rama-Hajrizi, i ka kryer në Universitetin e Prishtinës, ndërsa magjistraturën për Drejtësi dhe Qeverisje e ka kryer në Washington College of Law, American University, në Uashington DC, si bursiste e programit Rob Brown, dhuruar nga Departamenti i Shtetit i SHBA-së për studentët e Evropës Juglindore. Studimet e doktoratës është duke i vijuar në Universitetin e Prishtinës.[2]

Kryetarja Rama-Hajrizi është e martuar dhe ka dy djemë.[2]

Burimet[Redakto | Redakto nëpërmjet kodit]

  1. ^ "Ish-Gjyqtarët". Gjykata Kushtetuese. Gjykata Kushtetuese. Marrë më 2018-05-22.
  2. ^ a b c d e f g "Mr.sc. Arta Rama-Hajrizi". Gjykata Kushtetuese. Gjykata Kushtetuese. Marrë më 2018-05-22.