Bahri Haxha

Bahri Rexhep Haxha (3 shkurt 1972 – 2 maj 1999) ishte një intelektual, mësimdhënës dhe veprimtar i shquar nga Vushtrria, i cili dha jetën për lirinë e Kosovës gjatë luftës së fundit çlirimtare. I lindur në një familje me tradita të thella atdhetare nga Manza e Poshtme (ish-Sfaraçaku i Poshtëm), Bahriu trashëgoi frymën patriotike të paraardhësve të tij, përfshirë Vesel Haxha-Galicën, bashkëluftëtar i Azem dhe Shotë Galicës.

Bahriu u dallua që në fëmijëri për zgjuarsinë dhe përkushtimin ndaj dijes. Pas përfundimit të studimeve në fushën e informatikës, ai punoi si profesor në shkollën e mesme në Vushtrri. Gjatë luftës, ai iu bashkua Ushtrisë Çlirimtare të Kosovës, duke shërbyer në sektorin e logjistikës. Më 2 maj 1999, Bahriu u vra nga forcat serbe në Studime të Ulët, së bashku me mikun e tij Ruzhdiun.

Pas vdekjes, trupi i Bahriut u ri-varros në varrezat e dëshmorëve në Stanovc të Vushtrrisë në vitin 2005, pas kthimit të familjes së tij nga Britania e Madhe . Në nderim të kontributit të tij, shkolla ku ai punoi më parë u emërua Shkolla e Mesme Profesionale "Bahri Haxha".