Enea Kadiu

Enea Kadiu
Informacioni personal
Data e lindjes	14 korrik 1994 (32 vjeç)
Vendi i lindjes	Tiranë, Shqipëri
Gjatësia	1.76 m (5 ft 9 in)
Pozicioni(et)	Sulmues i majtë; Mesfushor i majtë;
Karriera me të rinjtë
2007–2009	Olimpik
2009–2010	Dinamo Tirana
2011–2013	Tirana U-19
2013–2016	Ali Demi (futsal)
Karriera ndërkombëtare
Vitet	Ekipi
2008–2009	Shqipëria nën-15
2010–2011	Shqipëria nën-17
2015	Shqipëria (Rërë)

Enea Kadiu (lindur më 14 korrik 1994) është një ish-futbollist shqiptar, i cili luante kryesisht si sulmues i majtë dhe mesfushor i majtë. I njohur për shpejtësinë, depërtimet dhe goditjen e fortë, ai u konsiderua si një nga talentet premtuese të futbollit të moshave në Shqipëri. Karriera e tij u ndërpre në moshë të re për shkak të dëmtimeve të përsëritura. Ai ka përfaqësuar Shqipërinë në nivelet rinore dhe ka qenë pjesë e kombëtares shqiptare në futbollin e rërës (beach soccer).

Karriera me klube

Hapat e parë dhe Akademia e Ali Demit

Kadiu e nisi karrierën e tij futbollistike në Akademinë e Klubit Sportiv "Ali Demi". Gjatë qëndrimit aty, ai u dallua si lojtari më i mirë i akademisë dhe u shpall golashënuesi kryesor i ekipit. Përveç futbollit në fushë të blertë, ai u aktivizua me shumë sukses edhe në futbollin e sallës (futsal), duke u shpallur Kampion i Republikës së Shqipërisë me ekipin e KS Ali Demi për tre sezone radhazi: 2013–2014, 2014–2015 dhe 2015–2016. Gjithashtu, në kampionatin Beach Soccer Albania të zhvilluar në Gjirin e Lalzit, ai spikati duke fituar "Këpucën e Artë" si golashënuesi më i mirë i turneut me 9 gola të shënuar për ekipin e Ali Demit.

Olimpiku, Dinamo dhe Tirana

Në moshën 13-vjeçare, Kadiu u transferua tek ekipi i FC Olimpik, aty ku për dy sezone radhazi ishte golashënuesi më i mirë i skuadrës. Kulmi i tij me këtë ekip ishte sezoni 2008–2009, ku ai u shpall Kampion i kampionatit U-15 si dhe fitoi Këpucën e Artë me plot 24 gola të shënuar. Po këtë sezon, ai dha një kontribut të rëndësishëm edhe në fitimin e Kupës për moshën U-15. Në ndeshjen finale të atij turneu, e luajtur kundër Partizanit dhe e fituar pas gjuajtjeve të penalltive, Kadiu ishte një nga autorët e golave gjatë kohës së rregullt.

Pas kësaj eksperience të suksesshme, ai iu bashkua radhëve të Dinamos së Tiranës, ku luajti deri në grupmoshat e të rinjve. Më pas, ai u bë pjesë e ekipit të të rinjve të Tiranës (U-19) ku u aktivizua gjatë sezoneve 2011–2013. Kadiu la gjurmë të rëndësishme me bardheblutë, duke arritur të shënojë 8 gola në total përgjatë sezonit 2012–2013. Megjithatë, dëmtimet e njëpasnjëshme (veçanërisht në gjurin e majtë) e detyruan ta ndërpriste ëndrrën për një karrierë profesioniste në moshën 20-vjeçare.

Karriera ndërkombëtare

Ekipet e moshave

Kadiu ka qenë pjesë e rregullt e ekipeve kombëtare shqiptare të moshave. Ai u grumbullua fillimisht me kombëtaren U-15 dhe më pas u bë pjesë thelbësore e U-17. Me fanellën kuqezi, ai ishte pjesë e ekipit në ndeshjet kualifikuese të Kampionatit Evropian të zhvilluara në Maltë. Ai ka pasur një rekord mjaft pozitiv me moshat, ku theksohet fakti se në ndeshjet miqësore me Kombëtaren U-17 ai ka shënuar plot 10 gola.

Kombëtarja e Futbollit të Rërës

Në vitin 2015, Kadiu u bë pjesë e Kombëtares së Shqipërisë së Futbollit të Rërës. Ai mbajti fanellën me numrin 3 dhe luajti në Lojërat Mesdhetare të Rërës (Mediterranean Beach Games) të zhvilluara në Pescara, Itali. Gjatë këtij turneu, ai u aktivizua në 5 ndeshje dhe shënoi një gol kundër përfaqësueses së Maltës më 5 shtator 2015, në një ndeshje të cilën Shqipëria e fitoi me rezultatin 5–2.

Jeta personale dhe karriera pas futbollit

Pavarësisht tërheqjes së hershme nga futbolli aktiv si pasojë e dëmtimeve, Kadiu vendosi të mos shkëputej nga sporti, por t'ia përkushtonte pasionin e tij edukimit dhe trajnimit. Ai ka përfunduar studimet e larta dhe është diplomuar me "Bachelor" dhe "Master Profesional".

Prej më shumë se tetë vitesh, Enea Kadiu ushtron me përkushtim profesionin e mësuesit të Edukimit Fizik. Në tetor të vitit 2014, ai u diplomua dhe u pajis me licencën UEFA B për trajner futbolli nga Federata Shqiptare e Futbollit, duke dhënë prej asaj kohe një kontribut të vyer në zhvillimin dhe edukimin sportiv të brezave të rinj në Shqipëri.

Trofe

Kampion i Shqipërisë U-15 me FC Olimpik: 2008–2009
Kupa e Republikës kampion me ekipin e KS Ali Demi (futsal)
Kampion i Shqipërisë në Futsal me KS Ali Demi (3): 2013–2014, 2014–2015, 2015–2016

Referime

Gazeta Sportive Panorama

Lidhje të jashtme