Gjenocidi i Gazës

Gjenocidi i Gazës
Pjesë e luftës në Gaza në konfliktin izraelito-palestinez
Foto të gjenocidit në Gaza: Lart: Shkatërrim i përhapur në Rripin verior të Gazës për shkak të fushatës së bombardimeve izraelite (shkurt 2025) Mes-majtas: Një fëmijë palestinez duke marrë trajtim mjekësor në dysheme në repartin e mbipopulluar të urgjencës së Spitalit Al-Shifa në Qytetin e Gazës (tetor 2023) Mes-djathtas: Një ambulancë e bombarduar që i përkiste Shoqatës së Gjysmëhënës së Kuqe Palestineze (janar 2024) Poshtë-majtas: Një burrë palestinez i ulur midis kufomave të mbështjella në kampin e refugjatëve Jabalia (tetor 2023) Poshtë-djathtas: Të zhvendosur Fëmijë palestinezë në Deir el-Balah duke u përpjekur të marrin ushqim të dhuruar nga organizatat bamirëse ndërkombëtare në mes të urisë në Rripin e Gazës për shkak të bllokadës izraelite (gusht 2024)
Data	Rripi i Gazës i okupuar nga Izraeli (Palestinë)
Data	Pas datës 7 tetor 2023 (2023-10-07) – aktualisht
Shënjestra	Populli palestinez
Lloji i sulmit	Gjenocidi, krimet e luftës, krimet kundër njerëzimit, masakrat, spastrimi etnik, zhvendosja e detyruar, bombardimi, bllokada, democidi, vrasjet e shënjestruara, uria, tortura, përdhunimi dhe dhuna seksuale, sulme ndaj shëndetësisë, parandalimi i lindjeve, ekocidi, urbicidi
Vdekje	73,300 vdekje direkte (figura e matur, korrik 2026) 463 vdekje nga uria (konfirmuar, nëntor 2025) 10,000 paramendohen të ngujuar nën rrënoja
Të lënduar	Të paktën 173,900
Autorët	Shteti i Izraelit
Çështje gjyqësore	Afrika e Jugut v. Izraeli Nikaragua v. Gjermania

Gjenocidi i Gazës është shkatërrimi sistematik, i qëllimshëm, dhe në vazhdim, i popullit palestinez në Rripin e Gazës i kryer nga Izraeli gjatë Luftës në Gaza. Ai përfshin masakrat, vrasjen e shënjestruar të fëmijëve (që llogariten si 30% e viktimave), mohimin e qëllimshëm të ushqimit, lëndimin serioz fizik dhe mendor, dhe parandalimin e lindjeve. Aktet e tjera përfshijnë bllokadimin, shkatërrimin e infrastrukturës civile, shkatërrimin e instituteve shëndetësore, vrasjen e punëtorëve shëndetësorë dhe ndihmëkërkuesve, shkaktimi i zhvendosjes masive me forcë, shkaktimin e dhunës seksuale, dhe shkatërrimin e vendeve arsimore, fetare, dhe kulturore. Gjenocidi është njohur nga një këshill special i Kombeve të Bashkuara dhe një komision hetimor, Shoqata Ndërkombëtare e Studiuesve të Gjenocidit, grupe të shumta të të drejtave njerëzore, qeveri të ndryshme shtetërore, studime të shumta gjenocidi dhe studiues të ligjit ndërkombëtar, dhe njohësve të tjerë.

Që nga muaji korrik 2026, të paktën 73,300 njerëz u patën vrarë në Gazë. Shumica dërrmuese e viktimave ka qenë civilë, dhe afro 50% kanë qenë femra dhe fëmijë. Krahasuar me konflikte të tjera ndërkombëtare, numri i vdekjeve të gazetarëve, punëtorëve humanitarë dhe shëndetësorë, dhe fëmijëve është ndër më të lartët. Mijëra kufoma të panumëruara mendohen të jenë të ngujuara nën rrënojat e ndërtesave të shkatërruara. Një studim në revistën mjekësore The Lancet llogariti që vdekjet nga lëndimet traumatike u numërua më pak se realiteti që prej qershorit 2024, duke cekur një numër më të madh të vdekjeve duke përfshirë vdekjet indirekte. Numri i të plagosurëve është më shumë se 173,000. Gaza ka numrin më të madh të fëmijëve të amputuar për kokë banori në botë; lufta në Gaza ka shkaktuar më shumë se 21,000 fëmijë të jenë të gjymtuar. Në korrik 2025, 18,457 fëmijë u listuan si të vdekur gjatë luftës nga autoritetet shëndetësore në Gaza, pa përfshirë vdekjet indirekte dhe ata të ngujuar nën rrënoja.

Një bllokadë izraelite ka kontribuar rëndë drejt urisë së konfirmuar. Në gusht 2025, afro 641,000 njerëz përjetuan nivele katastrofale të pasigurisë së ushqimit. Herët në konflikt, Izraeli ndërpreu rrymën dhe ujin në Gaza. Ai e riktheu më vonë ujin, por vetëm pjesërisht. Që nga muaji maj 2024, 84% e qendrave mjekësore të Gazës janë shkatërruar apo dëmtuar. Izraeli ka shkatërruar edhe një sasi të panumërt të vendeve të trashëgimisë kulturore, duke përfshirë të gjitha prej 12 universiteteve të Gazës, dhe 80% të shkollave të saj. Afro 1.9 milionë palestinezë—85% e popullatës—janë zhvendosur me forcë. Bombardimi i Izraelit poashtu ka shkaktuar trazira mjedisore anë e mbanë territorit.

Në dhjetor 2023, qeveria e Afrikës së Jugut nisi procedura, Afrika e Jugut v. Izraeli, kundër Izraelit në Gjykatën Ndërkombëtare të Drejtësisë (GjND), duke konstatuar shkeljen e Konventave të Gjenocidit. Në janar 2024, gjykata udhëroi Izraelin që të merr të gjitha masat në fuqinë e tij që të parandalojë aktet e gjenocidit, të parandalojë dhe të ndëshkojë inkurajimin e gjenocidit, dhe të lejojë shërbimet, mjetet dhe ndihmat humanitare në Gaza. Gjykata më vonë e urdhëroi Izraelin të rrisë ndihmën humanitare në Gaza dhe të ndalojë sulmin e tij në Rafah. Izraeli nuk i zbatoi plotësisht urdhërat e gjykatës.

Palestinezët e kanë theksuar marrëdhënien mes gjenocidit në Gaza dhe dhunës politike sioniste, duke e përshkruar si vazhdim i Nakbës dhe efekteve të saj afatgjate. Izraeli dhe përkrahësit e tij insistojnë që veprimet e tij nuk përbëjnë gjenocid, se janë përgjigje ndaj sulmeve të 7 tetorit, dhe se synimi i Izraelit ka qenë të shkatërrojë Hamasin dhe të lirojë pengjet izraelite. Vlerësimi i gjenocidit mes studiuesve të gjenocidit dhe ligjit ndërkombëtar është në marrëveshje në rritje, mirëpo disa akademikë dhe shtete e sfidojnë këtë.