Hamid Gjylbegu

From Wikipedia
Jump to navigation Jump to search

Hamid ose Hamit Gjylbegu (Shkodër, 28 shkurt 1889 - Elbasan, 24 shkurt 1979) ka qenë ushtarak dhe poet shqiptar, poezia e të cilit është cilësuar përfaqësuese e njëfarë neo-misticizmi.[1] Pas daljes në pension u dha pas krijimtarisë letrare dhe botoi shumë broshura me vjersha lirike, filozofike, për fëmijë, përkthime dhe folklor.[2] Shumë nga vëllimet e tij u ndaluan nga regjimi komunist në Shqipëri pas 1948, ndër to Agimi i filozofís, Çikrrime filozofije, Drita e s'vërtetës, Flutura ndër lule, Kunora e lumnís, Fletra e jetës: pasqyra e s'vërtetës.[3]

Biografia[edit | edit source]

U lind në Shkodër, i biri i Sulejmanit të Tahir Gjylbegut, ndër familjet hanedane të qytetit.[4] Ndoqi arsimimin fillor në mejtep dhe atë të mesëm administrativo-ushtarak në Ryzhdien e qytetit, vitin e fundit të së cilës e ndoqi dhe e kreu në Manastir. Shkollimin e mëpasëm ushtarak e vijoi në Akademinë Ushtarake në Stamboll, të cilën e kreu pas tre vjetësh.[5]

Në korrik të 1912 u emërua instruktor i rekrutëve të regjimentit të 38-të në Selanik. Gjatë Luftës së Parë Ballkanike shërbeu në korparmatën e Selanikut, e cila luftoi kundër trupave serbe në Kumanovë, Qyperli, Perlep e Manastir; më pas kaloi në frontin jugor kundër grekëve në Bilisht, Korçë e Janinë. Më 6 mars 1913 Janina iu dorëzua grekëve dhe Hamidi u dërgua rob lufte në ishullin Zanta. Në tetor u lirua dhe u kthye në Stamboll.[5]

Ktheu në Shqipëri në prag të ardhjes së Princ Vidit, duke shërbyer në xhandarmëri, ai luftoi kundër Kryengritjes së Shqipërisë së Mesme.[2] Ato vite organizata "Krahu Kombëtar" e themeluar në Durrës, kaloi në seli në Shkodër dhe me zgjerimin e saj iu afruan edhe Hamidi, Maliq beg Bushati, Riza Dani, etj.[6]

Referime[edit | edit source]

  1. ^ Norris, Harry Thirlwall (1993). Islam in the Balkans: Religion and Society Between Europe and the Arab World (në anglisht). Univ of South Carolina Press. ff. 192–195.  9780872499775.
  2. ^ a b Bushati, Hamdi (1998). Shkodra dhe motet. 1. Shkodër: Idromeno. f. 555. OCLC 645720493.
  3. ^ Peçi, Admirina (9 janar 2016). "Festivali i artit të ndaluar: 154 veprat e para që ndaloi regjimi komunist" (PDF). Shqiptarja.com: 20–21.
  4. ^ Bushati, Hamdi (1999). Shkodra dhe motet: Pemë gjenealogjike familjesh shkodrane. 3. Idromeno. f. 28.
  5. ^ a b Bushati, Xhahid (2018). Burra të vdekur - të gjallë... Fiorentia. ff. 110–111.  9789928191953.
  6. ^ Kaloçi, Dashnor (25 tetor 2003). "Hamid Gjylbegu, shkodrani që nuk votoi kurrë për komunistët". Gazeta Shqiptare. IV (2622): 12–13.