Harry Potter dhe Urdhri i Feniksit (filmi)

Nga Wikipedia, enciklopedia e lirë
Jump to navigation Jump to search

Harry Potter dhe Urdhri i Feniksit është një film anglo-amerikan i zhanrit fantazi i vitit 2007 me rregji të David Yates hedhur në treg nga Warner Bros. Pictures. Ky film është bazuar në novelën me të njëjtin titull të shkruar nga J. K. Rowling. Filmi, i cili është strumbullari i pestë i serive të Harri Poterit, është i shkruar nga Michael Golden Berg (I vetmi film në të gjithë serinë që nuk është i shkruar prej Steve Kloves) dhe u realizua nga David Heyman dhe David Barron. Historia ndjek vitin e pestë të Harri Poterit në shkollën e Hoguortsit ku Ministria e Magjisë përpiqet të mohojë rikthimin e Fluronvdekjes.

Në film rikthehen në rolet e Harrit dhe dy miqve të tij të ngushtë Ronit e Hermionës, përkatësisht Daniel Radcliffe, Rupert Grint dhe Emma Watson. Është filmi pasues i Harry Potter dhe Kupa e Zjarrit dhe ndiqet nga filmi i Harry Potter dhe Princi Gjakpërzier.

Xhirimet në natyrë u filmuan në Angli dhe Skoci, ndërsa skenat në mjediset e brendshme u xhiruan në Leavesden Film Studios në Watford. Xhirimet zgjatën nga shkurti deri në nëntor të 2006-ës, me një muaj pushim në qershor. Post-produksioni vijoi edhe disa muaj më pas, gjatë të cilëve u shtuan efektet vizuale. Buxheti i filmit u llogarit nga 75 deri në 100 milionë paund. [1][2]Warner Bros. e nxori në kinematë e Mbretërisë së Bashkuar në 12 korrik 2007 dhe në kinematë e Amerikës së Veriut në 11 korrik. Ky është filmi i parë i serisë i shfaqur në IMAX 3D.

Parë në prillit të vitit 2017,[3][4] Urdhri i Feniksit është i 39-ti në listën e filmave më fitimprurës të të gjitha kohërave. Filmi mblodhi gjatë një hapjes 5 ditore mbarë botërore 333 milionë dollarë dhe rreth 940 milionë dollarë në total, i dyti pas Pirates of the Caribbean: At World's End për fitimin më të madh të vitit 2007. Harry Potter dhe Urdhri i Feniksit u nominua për dy BAFTA Film Awards në 2008.

Skenari[redakto | redakto tekstin burimor]

Ndërsa mundohen t’i shpëtojnë një stuhie, Harri dhe Dadli sulmohen nga marrosësit. Harri përdor magjinë e Patronusit për t’i trembur. Të Dërslinjtë Harri merr një letër ku thuhet se është përjashtuar nga Hoguortsi për përdorim të magjisë në sytë e babanacëve. Urdhri i Feniksit, një organizatë sekrete e themeluar nga Albus Urtimori, i tregon Harrit se ai e ka bindur Ministrinë e Magjisë që të lërë Harrin të shpjegohet. Pastaj ata e marrin atë te shtabi i tyre i përgjithshëm dhe e vënë në dije se Ministria e Magjisë nuk e beson rikthimin e Fluronvdekjes. Nuni i Harrit, Sirius Blek, përmend se Fluronvdekja është vënë pas një objekti që nuk arriti dot ta shtinte në dorë gjatë sulmit të tij të mëparshëm.

Urtimori arrin në gjyqin e Harrit dhe bind Ministrin e Magjisë, Kornelius Gjelsheqerin të lejojë Harrin të rikthehet në Hoguorts. Në shkollë Harri mëson se Gjelsheqeri ka caktuar një mësuese të re për Mbrojtjen ndaj Arteve të Errëta të quajtur Dolores Umbrixh. Menjëherë ajo dhe Harrin konfliktohen gjatë një ore mësimi ku Harri flet për rikthimin e Fluronvdekjes dhe ajo përfundon duke e ndëshkuar atë për “gënjeshtrat” e tij. Ndëshkimi konsiston në detyrimin e Harrit që të shkruajë fjalët “Nuk duhet të them më gënjeshtra” me një pendë magjike, e cila gërvisht realisht dorën e tij. Kur Roni dhe Hermiona vënë re të gërvishturat në dorën e Harrit zemërohen, por Harri refuzon të shkojë te Urtimori, i cili është distancuar prej tij që prej verës së shkuar. Ndërsa kontrolli i Umbrixhit ndaj shkollës vjen dhe rritet, Roni dhe Hermiona ndihmojnë Harrin të formojë një grup sekret për të trajnuar studentët në magjitë e mbrojtjes, duke e quajtur veten e tyre “Ushtria e Urtimorit”. Umbrixhi mbledh disa nga studentët e Gjarpërblertit për të zbuluar grupin e fshehtë të Harrit. Ndërkaq, Harri dhe Ço Çang përjetojnë ndjenja romantike ndaj njëri-tjetrit.

Harri sheh një vizion ku Artur Uizli sulmohet prej këndvështrimit të sulmuesit të Arturit. Zbulohet që ekziston një lidhje mendore mes tij e Fluronvdekjes. I bindur se Fluronvdekja do të shfrytëzojë këtë lidhje me Harrin, Urtimori udhëzon Severus Pitonin t’i japë Harrit mësime mbi bllokimagjinë për të mbrojtur mendimet e tij prej ndikimit të Fluronvdekjes. Lidhja ndërmjet Harrit dhe Fluronvdekjes e detyron atë të largohet edhe më shumë prej miqve të tij. Ndërkohë, Belatriks Lestrejnxh, kushërira Hamorte e Siriusit, ia mbath prej burgut të Azkabanit së bashku me 9 Hamortë të tjerë. Në Hoguorts, Umbrixhi dhe Skuadra e Zbulimit nxjerrin në shesh Ushtrinë e Urtimorit. Urtimori ia mbath teksa Gjelsheqeri mundohet ta arrestojë atë. Umbrixhi bëhet drejtoresha e re e Hoguortsit. Marrëdhënia midis Harrit dhe Ço-së fillon të zbehet, pasi ai beson se ajo tradhëtoi Ushtrinë e Urtimorit te Umbrixhi. Ndërkaq, Harri zbulon rastësisht ë kujtimet e Pitonit arsyen përse ai e urrente babanë e tij, Xhejmsin, i cili shpesh e tallte atë.

Binjakët Uizli organizojnë një revoltë ndaj Umbrixhit. Harri ka një vizion tjetër, atë të Siriusit që torturohet prej Fluronvdekjes. Roni dhe Hermiona nxitojnë për te oxhaku i zjarrit të Umbrixhit që të vënë në dijeni Urdhrin përmes Rrjetit të Pluhurit, meqënëse i saji është i vetmi oxhak që nuk monitorohet, por Umbrixhi i ndalon përpara se ata të nisen. Ndërsa Umbrixhi torturon Harrin, Hermiona ia hedh Umbrixhit duke e çuar në Pyllin e Ndaluar në kërkim të “Armës Sekrete të Urtimorit”. Ajo dhe Harri e përcjellin atë te vendi i fshehtë i gjysmë-vëllait gjigand të Hagridit, Gropi, kur padashje përballen me centaurët, të cilët e rrëmbejnë Umbrixhin sepse ajo i sulmon dhe i ofendon ata. Harri, Hermiona, Roni, Luna, Nevili dhe Xhini fluturojnë për te Ministria e Magjisë nëpërmjet thestralëve në një përpjekje për të shpëtuar Siriusin.

Që të gjashtë hyjnë në Zyrën e Mistereve ku zbulojnë një sferë profecie, për të cilën ishte vënë në kërkim Fluronvdekja. Fill pas kësaj, atyre para u dalin pritë Hamortët duke përfshirë Lucius Malfoin dhe Belatriks Lestrejnxh. Luciusi tregon se ëndrra që ka parë Harri sikur Siriusi ishte duke u tortuar qe veçse një hile për të joshur Harrin në kurthin e tyre. Harri refuzon që t’i japë Luciusit profecinë dhe kështu nis një betejë midis Ushtrisë së Urtimorit dhe Hamortëve të pranishëm. Hamortët rrëmbejnë cdokënd si peng përveç Harrit, duke kërcënuar se do t’i vrisnin në qoftëse ai nuk dorëzonte profecinë.

Sapo Harri bëhet gati të dorëzojë profecinë, në dhomë vijnë vijnë Siriusi me Remus Lupinin së bashku me anëtarët e tjerë të Urdhrit si Nimfadora Tonks, Kingsli Shakelbolt dhe Mësysh Mudi. Ndërsa sulmojnë Hamortët, Luciusit i bie profecia nga duart duke e shkatërruar atë. Në momentin që Siriusi çarmatos Luciusin, Belatriksi vret Siriusin me mallkimin vrasës. Fluronvdekja shfaqet, por Urtimori vjen nëpërmjet Rrjetit të Pluhurit në momentin para se Fluronvdekja të vrasë Harrin.

Midis Fluronvdekjes dhe Urtimorit nis një dyluftim, që shkatërron një pjesë të madhe të atriumit të Ministrisë ndërsa Belatriksi ia mbath. Pasi të dy tregojnë se kanë aftësi të barabarta në luftim, Fluronvdekja pushton mendjen e Harrit dhe përpiqet që Urtimori të sakrifikojë Harrin, por dashuria që ai ndjen për miqte e tij dhe Siriusin e bën të pamundur për Fluronvdekjen që të qëndrojë gjatë në mendjen e tij. Zyrtarët e Ministrisë së Magjisë arrijnë përpara se Fluronvdekja të shtrupëzohet; Gjelsheqeri bindet dhe pranon se Fluronvdekja është rikthyer dhe heq dorë si Ministër. Umbrixhi shkarkohet nga Hoguortsi dhe Urtimori rivendoset drejtor i shkollës. Urtimori i shpjegon Harrit se u largua prej tij përgjatë vitit duke shpresuar të zvogëlonte rrezikun që i kanosej nga Fluronvdekja për shkak të lidhjes me të. Harri pranon profecinë “Asnjeri nuk mund të jetojë ndërsa tjetri mbijeton”.

Kasti[redakto | redakto tekstin burimor]

  • Daniel Radcliffe në rolin e Harri Poter.
  • Rupert Grint në rolin e Ron Uizlit, shokut të ngushtë të Harrit.
  • Emma Watson në rolin e Hermionë Granxher, shoqja tjetër e ngushtë e Harrit dhe “truri” i treshes.
  • Helena Bonham Carter si Bellatrix Lestrange, një nga Hamortët më besnikë të Fluronvdekjes dhe kushërira e Sirius Blekut.
  • Robbie Coltrane në rolin e Rubeus Hagridit, gjysmë-katanaja rojtar dhe mësuesi i Mbrojtjes për Krijesat Magjike si dhe pjesëtar i Urdhrit të Feniksit.
  • Ralph Fiennes në rolin e Fluronvdekjes, armikut numër një të Harrit që kërkon të pushtojë botën e Magjisë, si dhe udhëheqësi i Hamortëve.
  • Michael Gambon në rolin e Albus Urtimorit, drejtorit të Hoguortsit dhe kryetar i Urdhrit të Feniksit/ Order of the Phoenix.
  • Brendan Gleeson në rolin e Alastor Mudit, ish-mësuesi i Harrit i Mbrojtjes Kundër Arteve të Errëta dhe pjesëtar i Urdhrit të Feniksit.
  • Richard Griffiths si Vernon Dërsli, xhaxhai babanac i Harrit.
  • Jason Isaacs në rolin e Lusius Malfoit, babai i Drako Mallfoit dhe një Hamort i shquar.
  • Gary Oldman në rolin e Sirius Blekut, nuni i Harrit i arratisur nga Azkabani dhe pjesëtar i Urdhrit të Feniksit.
  • Alan Rickman në rolin e Severus Pitonit, mësuesit të Shurupeve dhe mësuesit kujdestar të Gjarpërblertit, i cili i shërben Urdhrit të Feniksit si një spiun mes Hamortëve.
  • Fiona Shaw në rolin e Petunia Dërsli, tezes babanace të Harrit.
  • Maggie Smith në rolin e Minerva MekGurit, mësueses së lëndës të Shndërrimit dhe mësueses kujdestare të Grifartit si dhe pjesëtare e Urdhrit të Feniksit.
  • Imelda Staunton në rolin e Dolores Umbrixh, mësuesja e re e Mbrojtjes ndaj Arteve të Errëta dhe një inspektore e Ministrisë së korruptuar të Magjisë.
  • David Thewlis në rolin e Remus Lupinit, ish-mësuesi i Mbrojtjes ndaj Arteve të Errëta të Harrit dhe një pjesëtar i Urdhrit të Feniksit.
  • Emma Thompson në rolin e Sybil Trelonej, mësueses së Parashikimit në Hoguorts.
  • Julie Walters në rolin e Molly Uizli, nëna e familjes Uizli dhe figura amësore për Harrin, si edhe pjesëtare e Urdhrit të Feniksit.

Ndarja e Roleve[redakto | redakto tekstin burimor]

Ndarja e roleve filloi herët në Maj të 2005, kur Radcliffe pranoi të rimerrte rolin e tij si Harri Poter. Pas histerisë mediatike gjatë Kupës së Zjarrit, shumica e aktorëve kryesorë pranuan të riktheheshin në rolet e tyre gjatë filmave të tjerë të serisë duke përfshirë Grint, Watson, Lewis, Leung dhe Fiennes. Medie të ndryshme lidhën Elizabeth Hurley me rolin e Belatriks Lestrejnxh, edhe pse Warner Bros. siguroi që nuk ishte e vërtetë që ajo ishte përzgjedhur. Që në gusht të 2005, thashethemet filluan të lidhnin Helen McCrory me rolin e Belatriks Lestrejnxh. Në 2 shkurt 2006 u deklarua se McCrory ishte përzgjedhur për rolin. Megjithatë në prill të 2006 ajo tha se ishte tre muaj shtatzënë dhe hoqi dorë nga filmi sepse nuk do të ishte e aftë tërealizonte skenat e forta të betejës në Ministrinë e Magjisë në shtator dhe tetor të 2006. Njoftimi se Bonham Carter ishte përzgjedhur për rolin u bë në 25 maj 2006. McCrory më pas u përzgjodh për të luajtur rolin e Narcisa Malfoit në Harry Potter dhe Princi Gjakpërzier që vijonte më pas.

Aktorët për personazhet e rinj u kërkuan përgjatë 2006. Evanna Lynch fitoi rolin e Luna Lovgud ndër 15,000 vajza të tjera të cilat pritën plot shpresa për një vend në trupën e përzgjedhur të aktorëve. Mospërfshirja e disa personazheve u prit me revoltim nga disa nga fansat pasi këto personazhe u konsideruan të rëndësishëm në librin e fundit, i cili doli në treg vetëm 10 ditë pas premierës së filmit. Në prill të 2006, përfaqësuesit e Jim McManus, thanë se ai do të luante rolin e Aberforth Urtimor, vëllai i Albusit dhe banakieri i Kokës së Derrit, në të cilën Harri dhe miqtë e tij themelojnë Ushtrinë e Urtimorit. Një javë më vonë Warnes Bros. tha se roli ishte mjaft i vogël, duke hedhur poshtë disa nga spekulimet mbi rëndësinë e personazheve, të cilët, para librit të fundit, nuk kishin as një pjesë dialoguese. MTV raportoi në Tetor të 2006 se Dobi, xhuxhi shtëpiak, i cili u shfaq në filmin e dytë dhe në librin e pestë, do të hiqej nga filmi duke bërë që të lindnin probleme me skenarin se si do të zëvëndësohej roli i xhuxhit. MTV gjithashtu raportoi një javë para nxjerrjes në treg të librit të pestë se Kriçeri, elfi shtëpiak i familjes Blek, ishte hequr nga skenari i filmit.

Sidoqoftë Rowling i bindi që ta përfshinin elfin, duke i thënë: “Po të isha në vendin e juaj, nuk do e hiqja. Ose ju mund ta hiqni, por në filmin e shtatë do të ketë kontradikta”, kështu që Kriçeri u vendos sërish në skenar.

Role të tjera të vogla u hoqën nga draftet e skenarit. Në premierën e Kupës së Zjarrit në SHBA, producenti i serive David Heyman tha se profesori i mëparshëm i Hoguartsit Xhilldroi Lokhart, i luajtur nga Kenneth Branagh te Harry Potter dhe Dhoma e të Fshehtave, ishte në draftin e parë të skenarit të Urdhërit të Feniksit. Por as Branagh, as personazhi i Lokhartit nuk shfaqen në versionin final. Tiana Benjamin ishte caktuar të rikthehej në rolin e Anxhelina Xhonson, kapitenes së skuadrës së Grifartëve të Kuidiçit, por u tërhoq pasi vendosi të luante Chelsea Fox në EastEnders. Si personazhi, ashtu edhe gjithë skenari mbi Kuidiçin u hoq nga filmi. Pavarësisht kësaj, ajo regjistroi disa nga kolonat zanore në lojën kompjuterike të Urdhrit të Feniksit.

Familja e futbollistit Theo Walcott u shfaq shkurtimisht në film. Ata ishin thirrur nga regjizori David Yates, i cili është bashkëshorti i Yvonne Walcott, tezja e Theo Walcott. Theo vetë donte të merrte pjesë përkrah familjes së tij, por u detyrua të tërhiqej pasi angazhimet te klubi i futbollit të Arsenalit nuk e lejuan.

Prodhimi[redakto | redakto tekstin burimor]

Drejtori i televizionit britanik David Yates u zgjodh për të drejtuar filmin pas Harry Potter dhe Kupa e Zjarrtë, ndërsa Mike Newell dhe Jean- Pierre Jeunet, Guillermo del Toro, Matthew Vaughn dhe Mira Nair, i hodhën poshtë ofertat. [5][6] Yates besonte se e zgjodhen per arsye se studioja e pa atë të aftë për të trajtuar një film "të mprehtë dhe emocional" me një "temë politike", si disa nga projektet e tij të mëparshme televizive si State of Play, Sex Traffic dhe The Girl in the Café. Producenti David Heyman mbështeti komentet e Yates mbi temën politike të filmit duke deklaruar se Urdhëri i Feniksit është një film politik, jo me një P të madhe por është rreth rebelimit adoleshent dhe shpërdorimit të pushtetit. Emma Watson ka deklaruar se "në njëfarë mënyre ajo flet për jetën pas sulmeve të 7 korrikut, për mënyrën se si njerëzit sillen kur janë të frikësuar mënyrën se si e vërteta shpesh mohohet dhe të gjitha gjërat që shoqërisë sonë i duhet të përballet. Përballja me faktin se autoriteti është i korruptuar do të thotë të kesh qasje jo konformiste ndaj realitetit dhe fuqisë."

Steve Kloves, skenarist i katër filmave të parë të Poterit, kishte angazhime të tjera. Michael Goldenberg, i cili hodhi në letër filmin e parë të serive, e plotësoi dhe shkroi skenarin e plotë.[7]

Provat për Urdhrin e Feniksit filluan më 27 janar 2006, xhirimet filluan më 7 shkurt të vitit 2006 dhe përfunduan në fillim të dhjetorit të 2006-ës.[8] Xhirimet u vunë në një pauzë prej dy muajsh duke filluar nga maji i 2006-ës pasi Radcliffe dhe Watson u duhej të kalonin disa provime. Buxheti i fimit thuhet të jetë mes 75 dhe 100 milion paund. Buxheti më i madh i filmave të tjerë në seri ka shkuar për shpenzimet e filmit Kupa e Zjarrtë me gati 75 milionë paund.

Mark Day bëri montazhin e filmit, Słaëomir Idziak ishte kinematograf dhe Jany Temime ishte kostumografi. Koreografi Paul Harris, i cili kishte punuar më parë disa herë me David Yates, krijoi një gjuhë fizike për shkopinjtë magjik duke krijuar koreografitë për luftimet dhe përdorimin e tyre.

Dizajni i Seteve[redakto | redakto tekstin burimor]

Stuart Craig u kthye si skenograf pasi kishte krijuar skenat e 4 filmave të parë. Në këtë film kishte një numër të konsiderueshëm setesh të reja skenografike. Atriumi në Ministrinë e Magjisë është mbi 61 metra i gjatë, duke e bërë atë setin skenografik më të madh dhe më të kushtueshëm të ndërtuar për filmat e Poterit. Dizajni i Crag u inspirua nga metrotë e hershme të Londrës ku, sipas tij, arkitektët "u përpoqën të imitojnë arkitekturën klasike duke përdorur pllaka qeramike" si dhe Burger King në Tottenham Court Road në Londër ku "gjendet një fasadë Viktoriane fantastike e cila mishëron atë epokë". Skenografia e Number Twelve, Grimmauld Place përmban një sixhade të familjes Blek që kalon përgjatë 3 mureve; kur producentët i thanë Rowling se ata donin të bënin të dukshëm detajet e secilit emër dhe datë lindjeje në të, ajo i nisi me faks atyre një kopje të plotë të pemës gjenealogjike. Skenografia e Dhomës së Profecive u ndërtua e gjitha në mënyrë digjitale. Gjatë një skene dueli profecitë rrëzohen përtokë dhe thyhen; nësë një skenë e tillë do të realizohej jo në mënyrë digjitale, koha e xhirimeve do të zgjaste për javë të tëra.

Skenografia e përdorur për gjyqin e Igor Karkarofit në Kupën e Zjarrit u dyfishua në përmasa për gjyqin e Harrit në këtë film, duke ruajtur në të njëjtën kohë simetrinë. Profesoresha e re, Dolores Umbrixh edhe pse jep mësim në një klasë e cila është shfaqur edhe në filmat 2, 3 dhe 4, ka një zyrë shumë më ndryshe nga ajo e paraardhësve të saj. Skenografia u ri-vesh "me filigran rozë" dhe një numër të madh pjatash mbi të cilat lëvizin kotele të cilat u përpunuan në post-produksion. Një shërbim fotografik prej 24 orësh u përdor për të fotografuar dhe xhiruar kotelet që do shfaqeshin në këto pjata. Penda për shkrim të cilën Umbrixh ia jep Harrit për të shkruar u realizua nga skenografët e filmit.

Xhirimet[redakto | redakto tekstin burimor]

Edhe pse producentët menduan opsione të tjera për të xhiruar jashtë Mbretërisë së Bashkuar, Leavesden Film Studios në Watford ishte sërish vendi ku shumë nga skenat kryesore, duke përfshirë Sallën e Madhe, Privet Drajvin dhe Numrin Dymbëdhjetë, Grimolld Plej, u xhiruan. Vendet në Angli përfshijnë lumin Tamiz, për fluturimin e Urdhrit të Feniksit për tek Numri Dymbëdhjetë dhe vendet përgjatë fluturimit të Ushtrisë së Urtimorit për në Ministrinë e Magjisë. Kjo sekuencë përfshin vende të njohura si Syri i Londrës, Skela Kanarinë, Big Ben, Pallati i Bakingamit dhe anijen HMS Belfast. Xhirimet në Platformën 9 e ¾-ta u bënë në stacionin King's Cross, siç është bërë edhe në filmat e mëparshëm. Një kabinë telefonike pranë shërbimit metropolitan policor të Scotland Yard u përdor për pjesën ku Harri dhe Artur Uisli shkojnë në Ministri ndërkohë që stafi mbylli stacionin e metrosë në Westminster në 22 tetor 2006 për të filmuar pjesën ku Artur Uisli shoqëron Harrin për te gjyqi në Ministrinë e Magjisë. Skena të tjera u filmuan rreth Oxfordit, saktësisht pranë Pallatit Blenheim në Woodstock.

Glenfinnan, Ekspresi i Hoguortsit kalon përmes një tuneli, siç ka ndodhur dhe në filmat e mëparshëm. Skenat ajrore u xhiruan në Glen Coe, në Clachaig Gully dhe Glen Etive, i cili gjatë filmimeve ishte një nga vendet e pakta në Skoci pa dëborë duke u bërë vendi ideal për shumë skena të xhiruara.

Regjisori David Yates tha në një intervistë se Urdhëri i Feniksit ishte 3 orë i gjatë, por shumë skena duhet të hiqeshin sepse filmi ishte 45 minuta më i gjatë se ç'duhej. Kështu, shumë vende të cilat u përdorën për të xhiruar skena të ndryshme nuk u shfaqën në film. Në Virginia Water, u xhirua skena ku profesoresha MekGur shërohet pas sulmit me shorti dhe Burnham Beeches u përdor pë të xhiruar skenën ku Hagridi i tregon vitit të pestë thestralët në klasën e Kujdesit ndaj Krijesave Magjike. Harri u shmanget gurëve perpara Monumentit të Glefinnanit në Glenfinnan në një skenë tjetër të prerë.

Efektet[redakto | redakto tekstin burimor]

Filmi përdori mbi 1400 xhirime për efektet vizuale dhe kompania londineze Double Negative krijoi më shumë se 950 prej tyre. Duke punuar për 6 muaj (duke filluar në Nëntor të 2005) Double Negative ishte përgjegjëse për pjesët në Dhomën e Nevojave, Pyllit të Ndaluar, Dhomës së Profecive si dhe Dhomës së Vdekjes.

Një personazh i ri ne film, Gropi, gjysmë-vëllai gjigand i Hagridit, erdhi në jetë nga një teknologji e re e quajtur "Kapja e Shpirtit" (Soul Capturing) e krijuar nga Image Metrics. Në vend të krijimit nga hiçi, u përdorën lëvizjet dhe shprehjet e fytyres së aktorit Tony Maudsley për të modeluar lëvizjet e Graopit.

Muzika[redakto | redakto tekstin burimor]

Nicholas Hooper ishte kompozitori i kolonës zanore, duke ndjekur John Williams që u mor me të tre filmat e parë dhe Patrick Doyle që u mor me filmin e katërt. Në regjistrimin e ri, Hooper përfshiu variacione të Hedwig's Theme, lajtmotivit të sagës, shkruar fillimisht nga Williams për filmin e parë dhe e dëgjuar në të gjithë filmat që pasojnë. Në mars dhe prill të 2007, Hooper dhe Orkestra e Dhomës së Londrës regjistruan rreth dy orë muzikë në Abbey Road Studios në Londër. Skenari, si i filmit dhe i librit, është më i errët se seritë paraardhëse. Për të theksuar këtë, dy kolonat kryesore zanore reflektojnë personazhin e ri të ligë, Dolores Umbrixh dhe pushtimin e mendjes së Harrit nga Fluronvdekja. Një daulle japoneze Taiko është përdorur për tinguj më të thellë të perkusionit. Kolona zanore doli në 10 korrik 2007, vigjiljen e premierës së filmit. Për punën e tij në film, Hooper u nominua për një cmim World Soundtrack Discovery. Reklama përmban pjesën “Divine Crusade” nga X-Ray Dog dhe “DNA Reactor” nga Pfeifer Broz. Music. Filmi gjithashtu përmban këngën “Boys Will Be Boys” nga The Ordinary Boys.

Ndryshimet e filmit nga libri[redakto | redakto tekstin burimor]

Me 766 faqe në versionin Britanik dhe me 870 në atë amerikan, Urdhri i Feniksit është libri më i gjatë në 7 vëllimet e Harry Potter-it. Skenaristi Michael Goldenberg e përshkroi detyrën e tij për të shkurtuar novelën si "kërkimi për mënyrën më të mirë për të shfaqur historinë në film. Detyra ime ishte që filmi të përkonte më shumë me shpirtin e librit, sesa me vetë librin." Goldenberg tha se Rowling i kishte kerkuar atij dhe producentëve, gjithashtu edhe Yates, që "ajo donte thjesht të shihte një film të mrekullueshëm dhe i dha leje që të ishin të lirë të bënin atë që e ndjenin se duhej bërë që ta përshtatnin librin në një film që ajo do ta adhuronte". Goldenbergu tha se shkurtimi i librit në mënyrë që të përkonte me afatin kohor të filmit, "u bë më i qartë kur ai kuptoi se parimi kryesor i skenarit ishte të tregonte udhëtimin emocional të Harrit". Ai dhe Yates, "kërkuan për cdo mundësi që të futnin ç'të mundnin aty." E aty ku nuk mundeshin, "t'i bënin homazhe" [konceptit të udhëtimit emocional të Harrit, ta vinin diku në sfond apo thjesht ta bënin të ngjante se po ndodhte "jashtë ekranit".

Një shkurtim që Goldenberg "urreu" të bënte, ishte prerja e pjesëve të Kuidiçit, sportit te Magjistarëve. "E vërteta është se çdo lloj filmi i bërë nga ky libër, kushdo që ta bënte, që do përfshinte dhe pjesën e Kuidiçit, do të kishte qenë një film më pak i "plotë", tha ai. Në liber, Roni rritet si personazh kur fillon të bëjë prova për skuadrën e Kuidiçit. "Roni që pranon sfidat dhe qëndron po aq lart sa Harri. U përpoqëm ta fusnim në film në mënyra të tjera, aq sa mundëm. Kështu që, kur e shikon, ndien se edhe pse detajet e asaj historie mund të mos jenë prezente, të pakten shpirti i saj është i pranishëm në film". Ndryshimi në fjalë zhgenjeu aktorin Rupert Grint, i cili po i priste me qejf skenat e Kuidiçit.

Në një skenë të rëndisshme në libër, Harri shikon një kujtim të babait të tij që poshtëron Pitonin në kohën kur ata ishin studentë së bashku dhe Pitonin që shan mamanë e tij pasi ajo u përpiqet ta mbrojë. Në film, është shkurtuar në formën e një "ideje", siç thote edhe Goldenberg. "Është një moment që ia vlen të theksohet, kur ti kupton që prindërit e tu janë si çdo qenie njerëzore me te metat e tyre. ... Gjërat vërtet janë shkurtuar por unë e mbajta thelbin e asaj skene aty – dhe ajo ishte çka më dha mundësinë e një historie adoleshentësh në rritje." Lili Poter në moshë të re nuk u shfaq në të vërtetë në film por disa xhirime promocionale tregojnë adoleshenten Susie Shinner në rolin e saj.

Skena te Shën Mungu, spitali në të cilin Harri dhe shokët e tij takojnë Nevil Longbotomin dhe mësojnë se prindërit e tij janë torturuar deri në humbje të kujtesës nga Belatriks Lestrejnxhi, është prerë sepse kërkonte ndërtimin e një seti të ri. Qëllimi kryesor i skenes u zhvendos në Dhomën e Nevojave pas njërit prej mësimeve të Ushtrisë së Urtimorit. Gjithashtu, për të përshpejtuar filmin, disa ngjarje në Ministri pararendëse në përballjen e Harrit me Voldemortin u hoqën, duke perfshire këtu dhe "Dhomën e Trurit”. Përballja e zonjës Uizli me një qulls në Grimolld Plejs, Roni, Hermiona dhe Mallfoi që bëhen prefektë, shfaqja e Mundungus Fleçerit dhe Florenci që jepte mësim në lëndën e Parashikimit të së Ardhmes, ishin te tjera skena të hequra.

Personazhi i Kriçerit, xhuxhit shtëpiak, që u perfshi në skenar vetëm në sajë të kërkesës së Rowling, luan një rol më të rëndësishëm ne liber sesa në film. Në libër, atë e shohim duke marrë disa nga sendet e vjetra të familjes Blek, që Urdhri i Feniksit i hedh në plehra, një nga të cilat është një varëse që bëhet jashtëzakonisht e rëndësishme në librin e shtatë. "Ishte pak e vështirë të përfshinim diçka të tillë në historinë tonë duke qenë se është për shumë më vonë" tha Yates. "Në menduam se me shumë mundësi mund ta shfaqnim më vonë dhe kështu bëmë". Megjithëse Kriçeri u përfshi në film, te gjitha skenat që perfshinin Dobin u hoqën dhe detyrat e tij të rëndësishme iu dhanë personazheve të tjera.

Rita Skiteri, gazetarja, roli i së cilës luhet nga Miranda Richardson në Kupën e Zjarrit, gjithashtu u hoq nga skenari. Në libër, Hermiona i bën shantazh që ajo të shkruajë një artikull që mbështet Harrin, ndërkohë që pjesa tjetër e botës së Magjistarëve nuk i besojnë ato çka ai thotë. Richardson tha se "nuk do të jetë kurre libri ne film ekzaktësisht... Do të marrin vetëm disa aspekte nga libri dhe do të bëjnë diçka që shpresojnë se do të jetë e sukseshme në treg dhe që do t'i bëjë njerëzit të duan ta shohin.

Shpërndarja[redakto | redakto tekstin burimor]

Marketingu[redakto | redakto tekstin burimor]

Reklama e parë u lëshua në treg ne 17 nëntor 2006, bashkë me një film tjetër të WB, Happy Feet. Reklama ishte e disponueshme në rrjet në 20 nëntor 2006, në faqen zyrtare të Happy Feet. Reklama ndërkombëtare doli online në 22 prill 2007 në orën 14:00. Në 4 maj 2006, reklama amerikane e filmit u transmetua përpara Spider-Man 3.

Tri afishe të nxjerra në internet tregonin Harrin të shoqëruar nga gjashtë shokë klase, mes tyre dhe Hermiona Granxheri, sollën disa kundershti në media. Ato ishin praktikisht njëlloj me përjashtimin e vetëm se njëra reklamonte nxjerrjen në treg nga IMAX. Në një afishe, profili i Hermiona Granxherit, luajtur nga Emma Watson, kishte të theksuar linjat trupore, në veçanti pjesën e gjoksit. Melissa Anelli, administruesja e faqes së famshme të fansave The Leaky Cauldron, shkroi:

"Emma Watson po luan rolin e një 15 vjeçareje dhe ajo në realitet është nën 18 vjeç. Rrëqethem duke imagjinuar se çfarë ka menduar personi që e realizoi. 'Nëse ia ngushtojmë pak belin dhe i zmadhojmë ca më tepër bustin, nëse i japim një ndriçim dramatik dhe flokë më biondë do të ketë një nur më të bukur.'"

Përfaqësuesit e WB më vonë shkruan rreth afishes: "Kjo nuk është afishja zyrtare. Fatkeqësisht kjo fotografi u postua aksidentalisht ne faqen zyrtare të IMAX."

Versioni i videolojës dizenjuar nga EA UK, u hodh në treg në 25 qershor 2007. Lego krijoi vetem një komplet. Një model të Hoguortsit, sasia më e vogël e modeleve për një film deri më sot. NECA prodhoi nje seri figurinash ndërsa një sasi më e madhe figurinash më të vogla në përmasa u prodhuan nga PopCo Entertainment, një kompani ndërkombëtare e Corg-it.

Shfaqja në kinema[redakto | redakto tekstin burimor]

Filmi është i treti në serinë e filmave të Harry Potter që është shfaqur njëkohësisht në kinematë tradicionale dhe IMAX. Shfaqja në IMAX përmbante filmin e plotë në 2D dhe 20 minutat e fundit në 3D. Sipas përllogaritjeve në mars të 2007-ës, nga Warner Bros. , filmi u shfaq në më shumë se 10.000 ekrane kinemash gjatë verës.

Filmi u shfaq në shumicën e shteteve në një periudhë 2 javore duke filluar nga 11 korriku i 2007-ës. WB u mundua t'i qëndronte datave të parashikuara për shumicën e vendeve, përveç Lindjes së Mesme dhe disa tregjeve të vogla të cilat ishin në sezon pushimesh gjatë asaj kohe. Tendenca e shfaqjeve në verë, megjithëse filmat zakonisht janë dhënë gjatë dimrit, "maksimalizon jashtëzakonisht mundësitë tona", tha një prej përfaqësuesve të WB.

Parapremierat e filmit filluan në mars te 2007-ës në zonën e Çikagos. Nën një siguri të rreptë për të penguar piraterinë, WB mori roje sigurie për të patrolluar rreshtat, duke kontrolluar për aparate celularë dhe mjete të tjera regjistruese, në parapremierën në Japoni. Premiera botërore u dha në Tokio, Japoni më 28 qershor 2007. Përdoruesit e rrjetit MySpace mund të sillnin kopje të profileve të tyre online për të përfituar hyrje falas për të parë parapremirat në 8 qytete të ndryshme në të gjithë vendin në 28 qershor 2007. Premiera në Mbretërinë e Bashkuar u shfaq në 3 korrik 2007 në Odeon Leicester Square të Londrës, gjatë së cilës ishte prezente dhe autorja e librit, J. K. Rowling. Premiera në SHBA u shfaq në Los Angeles në 8 korrik. Pas premierës, 3 yjet e reja të serisë së filmave, Radcliff, Grint dhe Watson, u nderuan me një ceremoni ku gjurmët e tyre të duarve, këmbëve dhe shkopinjve magjikë u vendosën në dyshemenë përpara Grauman's Chinese Theatre.

Fillimisht, Warner Bros vendosi për lëshimin në Australi me datë 6 shtator 2007, afërsisht 2 muaj pas shumicës së shfaqjeve të tjera botërore. Megjithatë, pas ankesave nga komuniteti australian, duke përfshirë këtu një peticion që siguroi 2,000 firma, data u afrua për në 11 korrik 2007. Datat e lëshimit në Mbretërinë e Bashkuar dhe SHBA u afruan gjithashtu, të dyja nga 13 korriku për në 12 dhe 11 korrik, respektivisht.

Megjithëse libri është më i gjati në të gjithë serinë (mbi 700 faqe), filmi është 138 min i gjatë (2 orë e 18 min), duke e bërë atë filmin e dytë më të shkurtër në seri.

Vidioteka[redakto | redakto tekstin burimor]

DVD-te përfshinin skena të shtuara, një reportazh që tregonte një ditë në jetën e Natalia Tena, e cila luajti Nimfadora Tonksin, një dokumentar nga A&E mbi filmat dhe librat dhe një dokumentar të shkurtër rreth montazhit të filmit. DVD-ROM-i përmbante një skenë të shkurtër të filmit të ardhshëm, Harry Potter dhe Princi Gjakperzier (2009). HD DVD dhe Blu-ray përmbajnë detaje ekstra të tjera, si "përvojë në film", një koment në të cilin anëtarë të Ushtrisë se Urtimorit ndajnë momentet e tyre të preferuara nga prodhimi i filmit, dhe dokumentare të shkurtër mbi "pikat e fokusit" që tregojnë se si janë realizuar disa skena të filmit. HD DVD gjithashtu përfshin një tipar të veçantë të quajtur "shikimi në komunitet", i cili mundëson pronarët e HD DVD për të parë filmin së bashku në internet. Urdhri i Feniksit ishte e shtata DVD më e shitur e vitit 2007, me 10.14 milione kopje me rezolucion të lartë. Të gjithë DVD-të së bashku shitën mbi 179.500 kopjeve, ku Blu-Ray kishte shitjet më të shumta.

Kishte dhe një DVD të tretë me video në prapaskena ku shihen sete të filmit. Kjo mund të gjendet vetëm te ato të blera te dyqanet e Target (Future Shop në Kanada). Paketa përfshinte një kod unik që aktivizon një kopje digjitale të filmit, e cili mund të luhej në një kompjuter në Windows Media Player. Kopja digjitale, megjithatë, nuk mund të luhet në pajisje si iPod apo Macintosh. Problemi u zgjidh pjesërisht, me vënien në dispozicion të filmit në dyqanet iTunes në Britaninë e Madhe, por jo në SHBA.

Reagimet[redakto | redakto tekstin burimor]

Suksesi financiar[redakto | redakto tekstin burimor]

Filmi u hap me një shfaqje botërore 5 ditore me një shumë të ardhurash 333 milion dollarë, hapja e tetë më e madhe e të gjitha kohërave. Në SHBA, biletat për qindra shfaqje të filmit në mesnatë që bliheshin online në faqen Fandango u shitën të gjitha duke arritur 90 % të shitjeve javore të biletave në këtë faqe. Ne SHBA dhe në Kanada, shfaqjet në mesnatë (shumë herët në mëngjes, në 11 Korrik) sollën 12 milionë të ardhura nga 2311 shfaqje në mesnatë duke u shndërruar në më të suksesshmet që janë shfaqur ndonjëherë. Në të ardhura 1 ditore, Urdhri i Feniksit u radhit mbrapa At World’s End, i cili kishte dalë vetëm katër orë më përpara në këtë datë. Në dokumentet e vjdhura në qershor të 2010 prej studios tregohej se Warner Bros. humbi afërsisht 167 milion dollarë prej kësaj gjëje.

Në SHBA dhe në Kanada, Urdhri i Feniksit arriti 32.2 milion dollarë të mërkurën në shfaqjet pas mesnate, duke u bërë e mërkura me më shumë të ardhura në historinë e suksesit financiar me një total prej 44.2 milion dollarësh në 4285 kinema. Kjo shumë të ardhurash ia kaloi atij të produksionit të Spider Man-2 nga Sony Pictures i cili kishte mbajtur rekordin që nga e mërkura e 2004-ës me 40.4 milion dollarë, derisa ky rekord u thye në 2009 nga filmi Transformers: Revenge of the Fallen me 62 milion dollarë. Ishte gjithashtu dita me hapjen e 5-të më të madhe të filmit në histori, në atë kohë duke lënë pas dhe At world's End që kishte siguruar 42.9 milion dollarë. U fituan 1.9 milion dollarë nga thyerja e 91 rekordeve në ekranet IMAX, dita me hapjen më të madhe që u arrit ndonjëherë për cdo ditë të javës kur shfaqeshin filmat në formatin IMAX, duke thyer dhe 1.8 milionët e Spider-Man 3. Në Mbretërinë e Bashkuar rezultati ishte i njëjtë. Filmi fitoi 16.5 milion paund gjatë shfaqjes katër ditore duke thyer rekordin e suksesit financiar në Britani për hapjen më të madhe në katër ditë që është arritur ndonjëherë në fundjavë.

Fitimet e Urdhrit të Feniksit janë 292 million në SHBA dhë në Kanada, duke u bërë filmi i pestë me më shumë fitime i 2007-ës në këto rajone dhe 49.2 milion paund ose 101.4 milion dollarë në Mbretërinë e Bashkuar. Në mbarë botën ka arritur fitime prej 647.8 milionë dollarësh, filmi i shtatë më me shumë të ardhura kudo në botë, për një total prej 939.8 million dollarësh duke u shndërruar në filmin e dytë të vitit më me shumë fitime pas Pirates of the Caribbean: At World's End' me një fitim prej 961 milion dollarësh. U bë filmi i gjashtë me më shumë fitime në historinë e asaj kohe, i dyti në mbarë botën dhe filmi i dytë Harri Potter që thyen rekordin e 900 milion dollarëve. Në dhjetor te 2015 është renditur i 32-ti në filmat me fitimin me te madh te te gjiha kohërave si dhe i katërti në sagën e Harry Potter pas Harry Potter and the Deathly Hallows - Part 2 me 1.341 milard dollarë, Harry Potter dhe Guri Filozofal me 974 milion dollarë, Harry Potter and the Deathly Hallows - Part 1 me 960 milion dollarë dhe filmi me me shumë fitime në 2007 në Australi dhe në Mbreterine e Bashkuar. Kompania IMAX dhe Warner Bros. Pictures deklaruan se filmi kishte fituar 35 milion dollarë në ekranet e IMAX në mbarë botën me një mesatare befasuese prej 243 mijë dollarësh duke u bërë filmi jo i animuar me më shumë fitime ndonjëherë në historinë e shfaqjeve nga IMAX-i. Në Afrikën e Jugut filmi arriti vendin e parë më një total 944082 dollarësh duke u shfaqur në 87 kinema.

Vlerësimet e kritikëve[redakto | redakto tekstin burimor]

Filmi mori përgjithësisht kritika pozitive. Ai është vlerësuar 78% te Rotten Tomatoes bazuar në 244 kritika, duke e bërë filmin më pak të vlerësuar të të gjithë serisë. Konsensusi i përgjithshëm aty shkruan "Nuk është e lehtë që libri më i gjatë i Harry Potter të bëhet filmi më i shkurtër, por regjizori David Yates bëri një punë të mirë duke krijuar një Urdhër Feniksi që është argëtues dhe plot aksion. Filmi u vlerësua me 71 pikë nga 100 pikë të mundshme te Metacritic, filmi i pestë më i vlerësuar pas Dhuratat e Vdekjes - Pjesa 2, I Burgosuri i Azkabanit, Kupës së Zjarrtë dhe Princit Gjakpërzier. Në CinemaScore audienca i dha filmit një notë "A-" në një shkallë që varionte nga A+ në F.

Charles Frederick i The Telegraph e titulloi artikullin e tij "Filmi Harri Poterit më i mirë dhe më i errët". Colin Bertram i New York Daily i dha filmit 4 yje nga 4,duke e quajtur filmin më të mirë të serisë dhe shkroi "të apasionuarit mbas Poterit duhet të jenë të lumtur që Yates e ka distiluar universin e gjerë të J. K. Rowling me përkujdesje dhe respekt." Mark Adams i The Sunday Mirror, ndërkohë që i dha filmit 4 nga 5 yje, e konsideroi si "një kënaqësi të ëmbël dhe të errët dhe një film që duhet parë patjetër". Rene Rodriguez i The Miami Herald i dha filmit 3 nga 4 yje dhe shkroi se filmi "është i pari film në atë që së shpejti do jetë një seri me 7 filma i cili nuk duket si thjesht nje tjeter adaptim që kapitalizon në emrin para-stampues të markës së Harry Potter. Në vend të kësaj, Feniksi ndihet si një 'film' i vërtetë."

Performanca e Imelda Staunton si Dolores Umbrixh dhe Helena Bonham Carter si Belatriks Lestrejnxh u pritën me mjaft pozitivitet; Staunton u përshkrua si "zgjedhja perfekte për rolin" dhe "një nga kënaqësitë më të mëdha të filmit." The Daily Mail e përshkroi portretin e Staunton ne rolin e Umbrixhit si "një shtesë freskuese", sepse vetë personazhi ishte diçka e ndërmjetme midis Margaret Thatcer dhe Hyacinth Bucket. Bonham Carter u tha se ishte një "talent vezullues por jo shumë mirë i përdorur." Variety lavdëroi portretizimin e Severus Pitonit nga Alan Rickman duke thënë se rrallë mund të ketë ndodhur që një aktor të bënte aq shumë me aq pak sa ai bën aty. E sapoardhura Evanna Lynch që luajti Luna Lovgudin, gjithashtu mori fjalë të mira nga kritikët duke përfshirë të përditshmen New York Times, të cilët e konsideruan magjepsëse.

Peter Travers i Rolling Stone përgëzoi treshen kryesore të aktorëve për perfomancën e tyre, në veçanti Radcliffe. "Një nga gëzimet më të mëdha të këtij filmi është të shohësh se si Daniel Radcliffe rritet në mënyrë kaq impresionuese në rolin e Harrit. Ai gërrmon thellë në personazhin dhe mankthet e Harrit. Është një performancë e veçantë, e cila prek të gjithë gamën e gjerë të emocioneve, nga dhimbja te frika." Rolling Stone e vlerësuan filmin më të mirë se katër të mëparshmit, duke humbur ëmbëlsinë e dy filmave të parë dhe duke ngritur temperaturën nga nxehtësia dhe rezonanca e filmit të tretë dhe të katërt. Peter Travers e quajti si filmin më të mirë të serisë për momentin "me të qeshurat, ankthin dhe energjinë për t'i bërë dhe mosbesuesit të çmendur pas Harrit".

Leo Lewis i The Times (në Londër) shfaqi zhgënjimin e tij për tri aktorët kryesorë të cilët nuk ishin në gjendje të tregonin anën emocionale të personazheve të tyre respektivë, duke e bërë filmin jo shumë të fortë. San Francisco Chronicle u ankua për kualitetin e dobët të historisë, ku njëzet minutat e para të filmit, ku Harri del në gjyq sepse kishte bërë magji jashtë shkolle dhe më pas lirohet nga të gjitha akuzat, nuk ndikuan për ta çuar historinë para. Kirk Honeycutt i The Hollywood Reporter shkroi se Feniksi është "ndoshta filmi më pak i kënaqshëm i gjithë serisë", dhe përveç disa skenave që të tërhiqnin vëmendjen, "magjia - magjia e filmit - ishte ajo që mungonte." Shkrimi i tij gjithashtu kritikoi përdorimin e paktë "të ajkës britanike", duke theksuar shfaqjet e shkurtra të Helena Bonham Carter, Maggie Smith, Emma Thompson, David Thewlis, Richard Griffiths dhe Julie Walters.

Çmimet[redakto | redakto tekstin burimor]

Para se të dilte në treg, Urdhri i Feniksit u propozua në një kategori të re në MTV Movie Awards të 2007-ës si "filmi me i mirë i verës që nuk keni parë akoma". Më 26 gusht 2007, filmi fitoi çmimin për "filmin veror të zhanrit aventurë dramë/aksion" nga Teen Choice Awards.

Filmi u nominua për disa "Scream Awards" në vitin 2007 të dhëna nga Spike TV, në kategoritë "The Ultimate Scream (Ulërima Supreme)", "filmi më i mirë fantastik", dhe "filmi më i mirë në kategorinë e filmave me seri". Në të njëjtat çmime, Daniel Radcliffe u nominua në kategoritë respektive për "heroin e zhanrit fantazi". Filmi fitoi çmimin si filmi më i mirë me seri dhe Ralph Fiennes fitoi çmimin si "antagonisti më i ligë". Filmi gjithashtu mori tre çmime në përurimin e ITV National Movie Awards si "filmi më i mirë familjar", "aktori më i mirë" për Radcliffe dhe "aktorja më e mirë" për Emma Watson. Urdhri i Feniksit ishte një nga dhjetë nominimet e vitit 2007 për "filmin e vitit nga Hollywood". Ai është nominuar edhe për çmimin "filmi më i mirë familjar jo i animuar" në Broadcast Film Critics Association dhe fitoi në 2007-ën çmimin "filmi dramatik i preferuar" nga People's Choice Award. Duke qenë i nominuar për gjashtë çmime "13th Empire Awards" në revistën Empire, ku përfshihej dhe çmimi për "filmin më të mirë", David Yates fitoi çmimin si "regjisori më i mirë". Yates më vonë mori çmimin BAFTA Britannia Award "për përsosmëri artistike në drejtimin e katër filmave të tij të Harry Potter", ndër të cilët renditej dhe Urdhri i Feniksit.

Nicholas Hooper mori një nominim për "World Soundtrack Discovery" për kompozimin e tij në film. Imelda Staunton u nominua për kategorinë "aktorja britanike jo protagoniste" në London Film Critics Circle Awards. Në çmimet BAFTA të vitit 2008, filmi u nominua për "dizajnin më të mirë të produksionit" dhe për "efektet speciale vizuale më të mira". Urdhri i Feniksit gjithashtu u nominua për çmime nga Art Directors Guild dhe Costume Designers Guild dhe arriti të fitonte çmimin për "efekte të jashtëzakonshme speciale në një film" nga Visual Effects Society nga 6 nominime që kishte aty. BAFTA e nominoi Urdhrin e Feniksit si "filmi më i mirë me metrazh të plotë" në 2007-ën ndërsa Hugo Awards e nominuan për "përshtatjen më të mirë dramatike" (me metrazh të gjatë) në 2008-ën.

Burimet[redakto | redakto tekstin burimor]

  1. ^ Cornwell, Tim (24 January 2007). "Oscars signal boom (except for Scots)". The Scotsman. Edinburgh. Marrë më 24 January 2007. 
  2. ^ Haun, Harry (20 June 2007). "Harry the Fifth". Film Journal International. Arkivuar nga the original më 26 June 2007. Marrë më 26 June 2007. 
  3. ^ "Worldwide Openings". Box Office Mojo. Marrë më 21 December 2015. 
  4. ^ "2007 Worldwide Grosses". Box Office Mojo. 6 March 2008. 
  5. ^ Daly, Steve (13 July 2007). "Harry the 5th". Entertainment Weekly. Marrë më 8 October 2007. 
  6. ^ Raphael, Amy (24 June 2007). "How I raised Potter's bar". The Observer. London. Marrë më 26 June 2007. 
  7. ^ Fienberg, Daniel (16 November 2005). "Screenwriter will sit out one Potter". Milwaukee Journal Sentinel. Arkivuar nga the original më 2 January 2008. Marrë më 3 March 2008. 
  8. ^ "Exclusive: Order of the Phoenix News". Empire. 14 March 2006. Marrë më 2 August 2007.