Konsulta Gjuhësore e Prishtinës

Konsulta Gjuhësore e Prishtinës ishte një organizim shkencor dhe kulturor me rëndësi të veçantë për standardizimin e gjuhës shqipe në Kosovë dhe viset e tjera shqiptare në ish-Jugosllavi. Konsulta u mbajt në Prishtinë më 27 dhe 28 prill 1968 dhe u organizua nga Instituti Albanologjik i Prishtinës në bashkëpunim me Fakultetin Filozofik të Universitetit të Prishtinës dhe institucione të tjera kulturore e arsimore të krahinës së atëhershme autonome të Kosovës.

Në këtë Konsultë morën pjesë 150 intelektualë të fushave të ndryshme (gjuhëtarë, shkrimtarë, pedagogë dhe veprimtarë të kulturës) nga Kosova, Maqedonia, Mali i Zi dhe Lugina e Preshevës. Ajo kishte për synim përafrimin e gjuhës së shkruar shqipe në këto vise me normën gjuhësore të përdorur në Shqipëri dhe zyrtarizimin e saj si gjuhë e përbashkët standarde për të gjithë shqiptarët pa dallim. Duhet theksuar se para organizimit të saj, ishin mbajtur tri takime tjera më të vogla përgatitore në vitet 1952, 1957 dhe 1963.

Ndër vendimet themelore të Konsultës Gjuhësore të Prishtinës ishte 'përdorimi i normës letrare të shqipes së Shqipërisë në tekstet mësimore, në botimet zyrtare dhe në mediat e shkruara', duke lënë mënjanë variantet lokale apo ndikimet nga gjuhët sllave. Konsulta përbënte një hap vendimtar drejt pjesëmarrjes së shqiptarëve të Kosovës dhe viseve tjera përreth në Kongresin e Drejtshkrimit të Gjuhës Shqipe (Tiranë, 1972), ku u vendos përfundimisht standardi i shqipes moderne.

Konsulta Gjuhësore e Prishtinës u konsiderua si akt i rëndësishëm kulturor dhe politik, që shprehte përpjekjet e shqiptarëve për ruajtjen dhe forcimin e identitetit kombëtar nëpërmjet gjuhës së përbashkët. Ajo u vlerësua nga studiuesit si themel për krijimin e një standardi unik të shqipes në gjithë hapësirën shqiptare.

Shih edhe

• Historia e gjuhës shqipe