Malet Dinarike

Malet Dinarike janë male në Gadishullin Ballkanik që shtrihen prej linjës Lubjanë-Goricë në veri deri te vija dislokative Pejë-Shkodër. Duke shkuar në jug të Sharrit, ky kompleks malor merr drejtimin jugor dhe njihet me emrin Helenide ose Pindet. Dinariket bien pjerrtas në Detin Adriatik. Nga ana e detit kanë pamjen e vargmalave mjaft të larta, të cilat në drejtim të mbrendshëm, përkatësisht kah Fusha e Panonisë ulen gradualisht. Dinariket perëndimore, jo vetëm që diferencohen për kah pjerrtësia, lartësia, por edhe për kah ndërtimi gjeologjik homogjen. Formacionet e trasha gëlqerorëve të mesozoikut, me shumë forma karstike, e bëjnë mjaft karakteristike dhe individuale.

Dinariket Lindore përkundrazi në ndërtimin e tyre, edhe pse kanë gëlqerore të mesozoikut me përhapje të madhe, kanë të pranishëm shiste dhe shkëmbinj ranorë të palezoikut në fundament, të cilat i bëjnë më të ndryshuar dhe më të veçantë.