Pazari i Vjetër i Tiranës

Pazari i Vjetër i Tiranës ishte një qendër e rëndësishme tregtare që funksionoi për rreth 300 vjet, duke u zhvilluar si zemra ekonomike e qytetit. I vendosur në kryqëzimin e rrugëve kryesore si Rruga e Dibrës, Durrësit, Shkodrës dhe Elbasanit, ai përbënte një pikë strategjike për tregtinë ndërqytetëse. Në fund të viteve 1800, pazari arriti kulmin e tij me rreth 727 dyqane , ku çdo rrugicë ishte e specializuar për zeje të caktuara, nga punimet e bakrit deri te qëndisjet me ar.

Në vitin 1907, Esat Toptani ndërmori një iniciativë për modernizimin e pazarit, duke shtruar rrugicat me kalldrëm dhe duke vendosur qepena modernë në dyer dhe dritare.

Megjithatë, më 19 dhjetor 1959 , Pazari i Vjetër u shemb për t'i hapur rrugë ndërtimit të Pallatit të Kulturës. Ky akt solli një humbje të madhe për komunitetin tiranas, pasi dyqanet që kishin funksionuar për shekuj nuk u zhvendosën dhe shumë pak prej tyre arritën të gjejnë hapësira alternative.

Pas prishjes së Pazarit të Vjetër , Pazari i Ri, i krijuar në vitin 1931 për të përballuar shtimin e aktivitetit tregtar, mbeti qendra kryesore e tregtisë së mishit, peshkut, perimeve dhe frutave në Tiranë. Në vitin 2017, Pazari i Ri u rijetësua nga Bashkia e Tiranës me mbështetjen e Fondacionit Shqiptaro-Amerikan të Ndërmarrjeve, duke u kthyer në një zonë të gjallë për blerje, kulinari dhe aktivitete kulturore.