SHFMU "7 Marsi" Bukosh

Shkolla Fillore e Mesme e Ulët "7 Marsi" Bukosh
Vendndodhja
Bukosh, Komuna Vushtrri Kosova
Të dhëna
Lloji	Shkollë publike

Shkolla Fillore e Mesme e Ulët “7 Marsi” në Bukosh është një institucion arsimor në komunën e Vushtrrisë, themeluar në vitin 1962.

Vështrim

Shkolla fillore në Bukosh u themelua fillimisht në vitin shkollor 1962/63 si paralele e ndarë fizike e shkollës fillore “Emin Duraku” në Novolan. Për shkak të kushteve të papërshtatshme dhe largësisë nga komuniteti, me kalimin e kohës u ndje nevoja për një shkollë të re në vetë fshatin Bukosh.

Objekti i ri shkollor u ndërtua në vitin 2011/12 dhe më 3 shtator 2012 u hap si shkollë e pavarur, me emrin “7 Marsi”, në nder të Mësonjëtorës së Korçës, e cila sot festohet si ditë e shkollës shqipe. Shkolla ka një infrastrukturë moderne, me 5 klasa mësimore, sallën e arsimtarëve, zyrën e drejtorit, bibliotekë, tualete të ndara dhe sistem të ngrohjes qendrore. Ajo shtrihet në një truall prej rreth 50 arësh duke përfshirë këtu edhe një fushë futbolli me asfalt si dhe pjesën e oborrit me gjelbrim.

Në këtë shkollë mësojnë 251 nxënës të ndarë në 9 paralele dhe 1 klasë parafillore, ndërsa procesin mësimor e udhëheq drejtori i shkollës me 15 mësimdhënës. Krahas mësimit, shkolla zhvillon edhe aktivitete jashtëkurrikulare, si grupi letrar “Ali Podrimja” dhe programe kulturore e artistike, përfshirë programin festiv Festa e abetares, pastaj programi për nder të ditës së shkollës si dhe programin e mbajtur më 21 nëntor 2012 për 100-vjetorin e Pavarësisë së Shqipërisë.

Shkolla “7 Marsi” vazhdon të jetë qendër e rëndësishme edukative dhe arsimore për nxënësit nga fshatrat Bukosh, Taraxhë, Liqej dhe pjesërisht Novolan, duke luajtur një rol të rëndësishëm në përgatitjen arsimore, edukative dhe kulturore të gjeneratave të reja.

Shih edhe

• Arsimi në Kosovë
• Komuna e Vushtrrisë
• Historia e arsimit shqiptar