Shaban Jashari

Shabani Jashari (2 prill 1924 - 5 mars 1998) ishte një figurë e shquar në historinë kombëtare, duke u dalluar me kontributin e tij si mësues, luftëtar për liri dhe dëshmor i Kosovës. Ai ishte një njeri i urtë dhe me vullnet të palëkundur për të mbrojtur identitetin dhe lirinë e popullit shqiptar. Shaban Jashari ishte babai i komandantit legjendar të Ushtrisë Çlirimtare të Kosovës, Adem Jashari, dhe një shtyllë e fortë për të gjithë familjen Jashari, e cila simbolizon qëndresën dhe sakrificën për lirinë e Kosovës.

Biografia

Shaban Jashari lindi më 2 prill 1924, në Prekaz të Poshtëm, si i biri i Murat Jasharit. Arsimin fillor e kreu në mejtep dhe medrese ndërsa e vazhdoi gjatë kohës së Luftës së Dytë Botërore te mësuesit e ardhur nga Shqipëria. Arsimimi ishte një pjesë e rëndësishme e jetës së tij që në fillimet e hershme. Në vitin 1949 filloi të punonte si mësues, në Skënderaj dhe fshatrat përreth. Pushteti i asaj kohe e mbante vazhdimisht nën vëzhgim për shkak të kontributit të tij si mësues dhe intelektual atdhetar që ishte si dhe për autoritetin e tij në Skënderaj dhe Drenicë. Në kuadër të përpjekjeve për ta penguar në misionin e tij fisnik të mësimdhënies ka qenë edhe tendenca e organeve të pushtetit për ta transferuar sa më shpesh nga një shkollë në një tjetër dhe në fund ishte kërkesa për transferim si mësues në Gjilan e në Gollak, por ai nuk kishte pranuar. Këtë profesion fisnik e ushtroi deri në vitin 1952, kur u arrestua nga regjimi jugosllav për shkak të bindjeve të tij patriotike.

Pas arrestimit, Shaban Jashari u detyrua të qëndronte për më shumë se gjashtë vjet në izolim nga familja, farefisi dhe miqtë, një periudhë që tregon vuajtjet e tij nën një sistem represiv që përndiqte shqiptarët e Kosovës. Pasi doli nga burgu, ai iu përkushtua bujqësisë, duke vazhduar një jetë të thjeshtë, por gjithnjë me mendjen te çështja kombëtare.

Përkundër pengesave, Shaban Jashari nuk hoqi dorë nga përpjekjet e tij për drejtësi dhe liri. Në vitin 1981, ai bashkë me bijtë e tij, Hamzën dhe Ademin, morën pjesë në organizimin e varrimit të Tahir e Nebih Mehajt, një akt që kishte rëndësi simbolike për frymën e rezistencës kombëtare. Edhe më vonë, kur familja Jashari u vu në shënjestër të regjimit serb, Shaban Jashari tregoi guxim të jashtëzakonshëm. Në sulmin e policisë serbe ndaj familjes më 30 dhjetor 1991, ai u arrestua, por u lirua për mungesë provash.

Në prag të luftës së hapur për çlirimin e Kosovës, Shaban Jashari qëndroi gjithmonë krah djemve dhe nipërve e mbesave të tij, duke dhënë një shembull frymëzues për qëndresën familjare dhe kombëtare. Më 22 janar 1998, gjatë një sulmi tjetër të forcave serbe, ai luftoi me guxim të pashoq për të mbrojtur familjen dhe shtëpinë. Ky guxim u përsërit edhe në sulmin masiv më 5, 6 dhe 7 mars 1998, kur forcat serbe kryen një operacion brutal për të asgjësuar familjen Jashari. Në këtë betejë heroike, të njohur si Epopeja e Ushtrisë Çlirimtare të Kosovës, Shaban Jashari ra dëshmor së bashku me shumë anëtarë të familjes së tij, duke hyrë përjetësisht në historinë e Kosovës si simbol i sakrificës dhe i luftës për liri.

Sakrifica e Shaban Jasharit dhe familjes së tij përbën një akt kulminant në historinë e Kosovës, që frymëzoi mobilizimin e Ushtrisë Çlirimtare të Kosovës dhe forcimin e përpjekjeve për çlirim. Ai kujtohet sot si një njeri i mençur, një edukator dhe mësues popullor shembullor si dhe një luftëtar që e vuri jetën e tij në shërbim të kombit. Roli i tij në mbrojtjen e pragut të shtëpisë, familjes dhe lirisë së Kosovës është një shembull i pavdekshëm i dashurisë së pakushtëzuar për atdheun.

Shiko edhe

• Jasharët
• Sulmi në Prekaz
• Ushtria Çlirimtare e Kosovës