Viktor Emanueli III

Nga Wikipedia, Enciklopedia e Lirë

Viktor Emanueli III (italisht: Vittorio Emanuele III; 1869-1947) ishte mbreti i Italisë në vitet 1900-1946. Njihet në historinë e Shqipërisë si uzurpator i fronit shqiptar pasi më 1939 trupat pushtuese italiane e detyruan Mbretin Zog të largohej; regjimi i tij fashist në Shqipëri përfundoi më 1943 me tërheqjen e ushtrisë italiane. Gjithashtu uzurpoi fronin perandorak të Etiopisë mes viteve 1936-1941.

Gjatë viteve të para të mbretërimit, Viktor Emanueli III u dëshmua si monark kushtetues, ndonëse u desh të ndërhynte disa herë për të zgjedhur kriza qeveritare të shkaktuara nga dallimet në pikëpamjet e shumta politike.

Megjithëse ishte mbret me të drejta sovrani, Viktor Emanueli III mbeti vetëm udhëheqës simbolik i Italisë pas marrjes së pushtetit nga Benito Musolini më 1922. Gjatë tërë kësaj kohe i pranoi qoftë në heshtje e qoftë përmes ceremonive politikat hegjemoniste të qeverisë fashiste të Musolinit. Më 1943, kur u bë e qartë se orientimi fashist do të sillte humbjen e Italisë, Viktor Emanueli III e shkarkoi Musolinin nga detyra e kreut të qeverisë dhe e burgosi atë. Megjithë orvatjet e tij për të ruajtuar regjimin monarkik dhe ambdikimin në favor të të birit më 1946, populli italian vendosi të shpallte republikën. Familja Savoj u shty në ekzil. Vdiq i mërguar në Aleksandri të Egjiptit.