Aristidh Kola

Aristidh Kola
Emri	Aristidh
Mbiemri	Kola
Lindur më	8 korrik 1944
Vdiq më	11 tetor 2000
Vdiq në	Athinë*
Kombësia	shqiptare
Shtetësia	greke
Profesioni	jurist,shkrimtar, studiues
Mirënjohje
Kryetar i Lidhjes së Arvanitëve

Aristidh Kola[1] ishte historian, publicist, dhe jurist. Ishte kryetar i Lidhjes së Arvanitëve.

Jeta

Ai lindi në Kaskaveli të Thivës ne Greqinë Qendrore, zonë e cila banohet kryesisht nga arvanitas. Aristidhi, si edhe mijëra e mijëra bashkëkombas të tij, u edukuan me frymën e dashurisë për traditat e të parëve, që trashëgoi kjo pjesë e popullatës shumëkombëshe e Greqisë së sotme.

Aristidh Kola studioi për jurisprudencë në Athinë dhe pas mbarimit të universitetit, për shumë kohë iu përkushtua traditave kombëtare të arvanitasve në Greqi. Vepra e tij kryesore, “Arvanitasit dhe origjina e grekëve”, bëri një jehonë të gjerë në botën arvanitase; njohu 9 botime brenda dhjetë vjetëve. Kola botoi revistën “Besa”, si dhe revistën tjetër “Arvanon”. Këto revista pasqyronin jetën dhe traditat e botës arvanitase.

Kontribute

Aristidhi bashkëpunoi me të gjitha rrethet e diasporës shqiptare në Botë. Ai mbante lidhje dhe bashkëpunoi me arbëreshët e Italisë, me shqiptarët e Amerikës, me intelektualë të Kosovës, të Turqisë dhe atyre të Shqipërisë. Ai ishte lidhur edhe me arbëreshët e Korsikës. A. Kola u bë i njohur në Greqi sidomos për përkrahjen morale që i dha luftës së UÇK-së duke u shfaqur në disa emisione televizive. Kjo shkaktoi reagimin e disa grupeve proserbe, me të cilat u ndesh në rrugë gjyqësore.

Miku i madh i të gjithë shqiptarëve

I qeshur dhe i dashur, Aristidhi [2] ishte mik i të gjithë emigrantëve shqiptarë në Greqi. Në zyrat e shoqatës arvanitase “Marko Boçari”, organizoheshin aktivitete politiko-kulturore për Shqipërinë, si dhe për personalitete të rëndësishme arvanitase të Greqisë.

Aristidh Kola ka bërë një punë këmbëngulëse për afirmimin e identitetit arvanitas në Greqi. Ai nisi hartimin e fjalorit arvanitas, vepër të cilën nuk arriti ta përfundonte. A. Kola vdiq në vitin 2000 pas një sëmundjeje të rëndë (leucemi në gjak).

Veprimtaria

• Arvanitasit dhe prejardhja e grekëve, 1983.
• Gjuha e Perëndive, 1989.
• Deklarata e Bashkimit Arvanitas. Fjalori Korrigjues i Fjalëve arvanite
• Fjalori Korrigjues i Fjalëve arvanite
• Fjalori Krahasues i Gjuhës Shqipe
• Greqia në Kurthin e Serbëve të Milosheviçit
• Kënga e Mercenarëve, prejardhja e grekëve
• Mithi dhe e Vërteta
• Varrimi i Tretë i Marko Boçarit

Shih edhe

• Aristidh Kola - esé nga Kolec Traboini 2014
• E vërteta përvëluese e Aristidh Kolës - libër me esé nga K. Traboini]]