Isuf Gjata

Nga Wikipedia, enciklopedia e lirë
Jump to navigation Jump to search
Isuf Gjata

Isuf Gjata lindi në Korçë në vitin 1891. Ashtu si shumë bashkëqytetarë të tij të asaj periudhe edhe ai ndërmori, për arsye ekonomike, që në moshë të re, rrugën e emigracionit në Shtetet e Bashkuara të Amerikës. Gjatë qëndrimit atje, ndonëse i detyruar të përballet me vështirësitë që karakterizonin kontekstin e emigracionit - dikur, ashtu si edhe sot - ai mori pjesë aktive në jetën sociale, kulturore, artistike dhe patriotike të bashkësisë ShqiptareAmerikës, si anëtar i shoqërisë “Vatra” të Bostonit.

Malli për familjen, qytetin e lindjes dhe atdheun e tij e shtyu të kthehet sërisht në Shqipëri, ku filloi punë si mësues. Në Korcë Isuf Gjata vazhdoi edhe veprimtarinë artistike, si anëtar i shoqërisë “Lyra” dhe i orkestrinës së saj të suksesshme, që gjallëronte jetën kulturore dhe artistike të qytetit.

Pushtimi i Shqipërisë nga Italia fashiste nuk u mirëprit në familjen me tradita patriotike të mësuesit Isuf Gjata. Veprimtaria e tij antifashiste dhe ajo e bijve të tij, të cilët u bashkuan që herët me luftën partizane për çlirimin e vendit, ra në sy të regjimit. Për këtë arsye ai u arrestua, u burgos dhe më vonë u internua në “Porto Romano”, në Durrës, ku qëndroi deri në kapitullimin e Italisë. Qëndrimi i tij në kampin e internimit kujtohet nga bashkëvuajtësit si stoik dhe i patundur.

Pas largimit nga kampi i internimit, Isuf Gjata u transferua në zonat e çliruara të rrethit të Korcës, ku iu dedikua hapjes së shkollave fillore dhe kurseve kundër analfabetizmit. Veprimtaria e tij atdhetare dhe antifashiste u këput në mes gjatë Operacionit të dimrit të vitit 1944. Ai u kap në befasi nga gjermanët dhe forcat kolaboracioniste të Ballit Kombëtar dhe u pushkatua.

Figura e mësuesit patriot, dëshmorit Isuf Gjata dhe veprimtaria e tij atdhetare është nderuar në Korcë, në qytetin e tij të lindjes, duke i dhënë emrin e tij njërës prej shkollave të qytetit.