Lëvizja ndërkombëtare e Kryqit të Kuq dhe Gjysmëhënës së Kuqe

Emblemat e Kryqit të Kuq dhe Gjysmëhënës së Kuqe, simbolet nga të cilat lëvizja ka marrë emrin e saj, Gjenevë, 2005.

Lëvizja ndërkombëtare e Kryqit të Kuq dhe Gjysmëhënës së Kuqe është një lëvizje humanitare ndërkombëtare me rreth 97 milionë vullnetarë, anëtarë dhe staf në mbarë botën, e cila u themelua për të mbrojtur jetën dhe shëndetin e njeriut, për të siguruar respekt për të gjitha qeniet njerëzore dhe për të parandaluar dhe lehtësuar vuajtjet e njerëzve. Selia e saj është në Gjenevë, Zvicër.

Megjithëse është një organizatë e madhe ndërkombëtare, ajo drejtohet privatisht. Asnjë qeveri nuk e kontrollon Kryqin e Kuq. Kryqi i Kuq ka një status të veçantë: është i vetmi grup privat që i ka detyrat e tij të përcaktuara me ligj ndërkombëtar.

Tre elementet që e përbëjnë këtë lëvizje janë:

• Komiteti Ndërkombëtar i Kryqit të Kuq, i cili u krijua më 1863 në Gjenevë. Puna e tij, sipas ligjit ndërkombëtar, është të mbrojë jetën dhe dinjitetin e viktimave të luftës.
• Federata Ndërkombëtare e Shoqatave të Kryqit të Kuq dhe Gjysmëhënës së Kuqe, e themeluar në vitin 1919. Kjo Federatë përpiqet të sigurojë që shoqëritë kombëtare të Kryqit të Kuq dhe Gjysmëhënës së Kuqe të punojnë së bashku dhe të organizojnë misionet e ndihmës në rast emergjencash në shkallë të gjerë. Sekretariati i Federatës Ndërkombëtare gjithashtu është i vendosur në Gjenevë, Zvicër.
• Shoqëritë kombëtare të Kryqit të Kuq dhe Gjysmëhënës së Kuqe, të cilat ekzistojnë në pothuajse çdo vend të botës. Secila punon në vendin e vet, duke ndjekur parimet e ligjit ndërkombëtar humanitar dhe statutet e Lëvizjes ndërkombëtare. Nëse është e mundur, Shoqëritë Kombëtare mund të marrin përsipër detyra shtesë humanitare që nuk përcaktohen drejtpërdrejt nga ligji ndërkombëtar humanitar ose mandatet e Lëvizjes.

      
Kryqi i Kuq, Gjysmëhëna e Kuqe dhe Kristali i Kuq
Simbolet ndërkombëtare të Kryqit të Kuq

Lidhje të jashtme

• Webfaqja zyrtare Arkivuar 12 gusht 2007 tek Wayback Machine