Agjencia Kombëtare e Punësimit dhe Aftësive

Agjencia Kombëtare e Punësimit dhe Aftësive.

Shkurtesa	A.K.P.A.
Formuar më	2019
Selia	Bulevardi "Bajram Curri", 1004, Tiranë, Shqipëri.
Rajoni i shërbimit	Republika e Shqipërisë
Gjuha zyrtare	Shqip
Drejtor	Klevis Hysa
Organizata amë	Ministria e Ekonomisë, Kulturës dhe Inovacionit
Faqja në internet	www.puna.gov.al

Agjencia Kombëtare e Punësimit dhe Aftësive (AKPA) është një institucion në varësi të Ministrisë së Ekonomisë, Kulturës dhe Inovacionit. AKPA-ja është tërësia e institucioneve administrative dhe ofruese e shërbimeve të punësimit, të vetëpunësimit dhe të arsimit profesional. A.K.P.A. u krijua si rezultat i bashkimit të Shërbimit Kombëtar të Punësimit dhe Institutit të Formimit Profesional. Ajo funksionon nëpërmjet Zyrave Rajonale dhe Vendore të Punësimit, Drejtorive Rajonale të Formimit Profesional Publik si edhe Shkollave të Arsimit Profesional Publik.

Misioni

Misioni i AKPA-së është të sigurojë përmbushjen e të drejtës së shtetasve shqiptarë, të huaj dhe pa shtetësi të huaj, që kanë përfituar statusin e refugjatit si dhe të azilkërkuesit në territorin e Republikës së Shqipërisë, për t’u trajtuar me shërbime dhe programe publike të punësimit, të vetëpunësimit dhe të kualifikimeve profesionale, me qëllim gjetjen e një pune të përshtatshme, brenda dhe jashtë vendit, si dhe ofrimin e këtyre shërbimeve.

Fushat e Përgjegjësisë

• Të garantojë nivelin e cilësisë së shërbimeve të ofruara për punësimin, vetëpunësimin dhe arsimin e formimit profesional, nëpërmjet monitorimit dhe vlerësimit;
• Të organizojë punën për administrimin dhe zbatimin e programeve aktive e pasive të tregut të punës;
• Të organizojë punën për administrimin e ofruesve publikë të arsimit dhe formimit profesional (AFP), sipas legjislacionit në fuqi për arsimin dhe formimin profesional në Republikën e Shqipërisë;
• Të sigurojë se funksionet e lidhura me planifikimin, zbatimin, kontabilitetin dhe raportimin financiar për drejtoritë rajonale, zyrat vendore dhe ofruesit publikë të arsimit dhe formimit profesional, kryhen në përputhje me legjislacionin në fuqi.

Shiko edhe

• Ministria e Ekonomisë, Kulturës dhe Inovacionit