Faik Mustafa

Faik Mustafa (19 maj 1945, Tetovë - 13 shkurt 2017, Prishtinë ishte një gazetar nga Tetova.

Biografia

Faik Mustafa, shkollën fillore dhe të mesme i kreu në Tetovë. Studimet në Fakultetin Filologjik- Dega e Albanologjisë, i filloi në Beograd. Për shkak të kushteve të vështira ekonomike, detyrohet që një vit të punojë. Kështu, punoi si mësues (1964/65) në fshatin Grupçin të Tetovës, më 1966/67 në fshatin Shipkovicë të Tetovës dhe 1968/69 në fshatin Sellcë të Tetovës, ku pas tre muajsh, si organizator i demonstratave burgoset dhe dënohet me pesë vjet e gjysmë heqje lirie. Pas lirimit nga burgu (3 vjet të mbajtura), vazhdon dhe i përfundon studimet në Prishtinë.

Gjatë studimeve në Prishtinë, punoi gazetar në gazetën studentore "Bota e re", prej nga politika e LKJ-së e largon nga puna me tërë stafin e redaksisë, pas tri vitesh. Më vonë punësohet në të përditshmen "Rilindja", prej nga, si ish-i dënuar politik, nuk e lejojnë ta vazhdojë punën. Me ndihmën e shokëve, punësohet në gazetën e atëhershme KXEMK "Kosova" të Obiliqit (1975/1979), për të kaluar me punë në Kuvendin e Komunës së Prishtinës, si redaktor i gazetës "Gazeta e Delegatëve". Më 1990, ndër të parët, e largojnë nga puna si nacionalist, irredentist... Gjatë viteve 1994-1998 punoi si korrespondent i Zërit të Amerikës nga Maqedonia, kurse gjatë viteve 1998-2002 ishte kryeredaktor i gazetës së përditshme "Flaka e vëllazërimit", së cilës shumë shpejtë do t'ia heqë bishtin ideologjik komunist (Vëllazërimit) për të mbetur vetëm "Flaka". Pas kësaj u emërua drejtor i Qendrës së Kulturës në Tetovë (2006-2008), ku edhe u pensionua.

Me shkrime ka filluar të merret qysh si nxënës i gjimnazit, për të vazhduar bashkëpunimin me shumicën e gazetave dhe revistave të kohës në Kosovë e në Maqedoni. Ka shkruar vjersha për fëmijë, tregime për të rritur, pjesë teatrale, komedi, TV dhe radiokomedi, drama, skeçe, ku disa herë ka fituar edhe shpërblime.

Shih edhe

• Tetova
• Gazetaria