Festivali Folklorik Kombëtar

Nga Wikipedia, enciklopedia e lirë
Jump to navigation Jump to search

Festivali Folklorik Kombëtar është veprimtaria më e rendesishme mbarëkombetare folklorike në Shqipëri. Kjo veprimtari zhvillohet në Kalanë e qytetit të Gjirokastrës njëherë në katër vjet. Në të marrin pjesë të gjitha grupet folklorike shqiptare si dhe grupe nga shqiptarët e Kosovës, Malit të Zi, Maqedonisë, si dhe nga arbëreshët e Italisë, Turqisë, Amerikës, Greqisë dhe grupe folklorike nga vende te ndryshme si të ftuar. Festivalet folklorike organizoheshin fillimisht në qytetin e Tiranës. Të tillë ishin katër festivalet e para folklorike kombëtare, përkatësisht në vitet: 1946, 1949, 1952, 1957.

Festivali i cili u parapriu festivaleve folklorike kombëtare të Gjirokastrës[1], ishte festivali folkolirik i zhvilluar në Tiranë më 25 - 27 nëntor 1959, me siglën 'Festivali Kombëtar i Këngës, Muzikës dhe Valleve'. Në këtë festival morën çmime për herë të parë solistë popullorë si: Laver Bariu, Ndue Shyti, gjithashtu u vlerësuan me diploma të ndryshme rreth 400 pjesëmarrës.

Festivali i parë Folklorik Kombëtar i Gjirokastrës u zhvillua në vitin 1968, më 8 - 16 tetor. Pas këtij festivali të parë, ku morën pjesë të gjitha rrethet e vendit, në çdo pesë vjet (përkatësisht: 1973, 1978, 1983, 1988), në kalanë e këtij qyteti u zhvilluan rregullisht festivale folklorike kombëtare.

Në festivalin folklorik të vitit 1973 në fazën finale morën pjesë 1370 pjesëmarrës; në festivalin e vitit 1978, në fazën përzgjedhëse u aktivizuan rreth 53.000 pjesëmarrës, ndërkohë që vetëm 1560 bartës interpretuan gjatë ditëve të festivalit.

Në vitin 1995 festivali folklorik u zhvillua në kalanë e qytetit të Beratit dhe në shtator të vitit 2000 ky aktivitet madhor u rikthye përsëri në qytetin e Gjirokastrës.

Festivalet folklorike kombëtare[Redakto | Redakto nëpërmjet kodit]

  1. Tiranë 1946
  2. Tiranë 1949
  3. Tiranë 1952
  4. Tiranë 1957
  5. Tiranë 1959
  6. Elbasan 1966
  7. Lezhë 1967
  8. Gjirokastër 1968
  9. Gjirokastër 1973
  10. Gjirokastër 1978
  11. Gjirokastër 1983
  12. Gjirokastër 1988
  13. Berat 1995
  14. Gjirokastër 2000
  15. Gjirokastër 2004
  16. Gjirokastër 2009
  17. Gjirokastër 2015

Referime[Redakto | Redakto nëpërmjet kodit]

  1. ^ Rreth Festivalit ne Argjirofest ueb sajti, http://argjirofest.info/rreth-festivalit/ Archived 10 December 2015[Date mismatch] at the Wayback Machine.