Lëpjetë me qepë të skuqura

Lëpjeta pastrohet nga gjethet e dëmtuara, lahet me ujë të bollshëm duke e ndërruar 2-3 herë dhe hidhet në ujë të vluar me kripë ku zien për 5-7 minuta. Pastaj kullohet dhe pritet.

Në tigan me yndyrë skuqen qepë të njoma të grira hollë, shtohet lëpjeta, hudhra të shtypura, kripë e piper, përzihen mirë dhe lihen në zjarr 2-3 minuta të tjera. Lëpjetë me qepë mund të nxirret si gjellë e veçantë ose si garniturë me gjellë me mish. Gjithashtu lëpjetë me qepë shkon mirë dhe me vezë. Në këtë rast lëpjeta e gatshme vendoset nëpër pjata dhe sipër vihen vezë syza të skuqura në çast. Gjatë vendosjes në pjata lëpjeta spërkatet në lëng limoni ose limontoz të tretur në ujë.

Për 4-5 persona duhen :

• lëpjetë 1 kg,
• vaj 4-5 lugë gjelle,
• qepë 2 kokrra,
• hudhra 4-5 thelpinj,
• kripë, piper.