Sistemi i vlerësimit Elo

Sistemi i vlerësimit Elo është një metodë për llogaritjen e aftësisë relative të lojtarëve në lojëra ku konkurrojnë dy kundërshtarë, si për shembull shahu. Ai përdoret gjithashtu si sistem vlerësimi në shumë lojëra kompjuterike ku garojnë lojtarë të shumtë.

Fjala Elo shpesh shkruhet me shkronja të mëdha, megjithatë nuk është një akronim. Ajo rrjedh nga mbiemri i krijuesit të saj, profesor Arpad Elo (Árpád Élő), një fizikant amerikan me origjinë hungareze (1903-1992)

Përllogaritja

Vlerësimi Elo i një lojtari është një numër që mund të ndryshojë në varësi të rezultateve të lojërave të vlerësuara që ai zhvillon. Pas çdo ndeshjeje, lojtari fitues merr pikë nga ai humbës. Diferenca midis vlerësimit Elo të fituesit dhe humbësit përcakton numrin total të pikëve të fituara ose të humbura pas lojës. Nëse lojtari me vlerësim më të lartë fiton, vetëm disa pikë do të merren nga ai me vlerësim më të ulët. Megjithatë, nëse lojtari me vlerësim më të ulët arrin një fitore befasuese, shumë pikë do të kalohen. Në rast të një barazimi, lojtari me vlerësim më të ulët do të fitojë disa pikë nga lojtari me vlerësim më të lartë. Kjo do të thotë se sistemi i vlerësimit është vetërregullues. Lojtarët me vlerësime tepër të ulëta ose të larta, në afatgjatë, do të performojnë përkatësisht më mirë ose më keq se parashikimi i sistemit, duke fituar ose humbur pikë derisa vlerësimet të pasqyrojnë realisht fuqinë e tyre të lojës.