Mbetjet e një ure romake në Rogovë
| Mbetjet e një ure romake në Rogovë | |
|---|---|
| Lloji | Arkeologjike |
| Vendndodhja | Rogovë, Gjakovë, Kosovë |
| Ndërtuar | Romake |
| Emri zyrtar: Monument / Ansambël | |
| Lloji | Nën mbrojtje |
| Nr. i referencës | 3619 |
Mbetjet e një ure romake në Rogovë është një monument i trashëgimisë kulturore në Rogovë, Gjakovë, Kosovë.[1] Ky monument është i kategorisë "Arkeologjik".
Pranë tokave të njohura me toponimin Sacaranica, në një kthesë të lumit Drini i Bardhë, gjendën ende sot gjurmët e një ure të vjetër. Vërejmë këtu se krahu i djathtë i lumit, në drejtim të rrjedhjes së tij, përbëhet nga një shkëmb i butë, i cili e ka ruajtur për një kohë të gjatë konfiguracionin e meandrit lumor në këtë vend. Nga kjo urë e vjetër, ruhen ende sot tri pjesë të saj; dy pjesë në krahun e djathtë të lumit dhe një bazament këmbe ure në krahun e majtë. Këmbët e urës janë ndërtuar me gurë mesatarë dhe të mëdhenj, të lidhur me llaç gëlqereje me cilësi të mirë. Muri është ndërtuar me breza të alternuar gurësh dhe rrasash guri, mënyrë ndërtimi kjo, që të kujton teknikën e njohur "opus mixtum", por këtu në vend të rreshtave të tullave, kemi të përdorur rreshtat e rrasave prej guri. Mbas çdo brezi gurësh të mëdhenj, të lidhur me një sasi llaçi të bollshëm, që duket në fugaturat e trasha nga 5 deri në 6 cm., vjen një brez me 3-4 rreshta rrasash guri gëlqeror me trashesi 5–6 cm. dhe me fugatura llaçi më të imta nga 1 deri në 2 cm. Llaçi i cilësisë së lartë është i përbërë nga gëlqere e bardhë dhe zhavorr i imët në fugaturat e rrasave dhe zhavorr i trashë lumi, në fugaturat e brezit të gurëve.
Qëndrueshmëria ndaj veprimtarisë erozive të lumit dëshmon për një llaç mjaft të fortë. Trashësia e murit të ruajtur është 1,80 m. Në të dy pjesët e ruajtura të murit të urës vërehen ende sot vrima trarësh, që e kanë përshkuar murin tej për tej, të cilat kanë prerje kuadratike, me përmasa 15 x 18 cm. Me kalimin e kohës, trarët e drurët janë kalbur dhe kanë lënë si gjurmë të tyre vrimat tejshpuese nga njëra faqe në faqen tjetër të murit të urës. Kjo urë ndodhet vetëm 3–4 km në vijë ajrore nga "castrum-i i Gexhës" dhe ka mundësi të vihet në lidhje me të, duke qenë në kontekstin e një rruge romake, që mund të ketë ndjekur rrjedhjen e Drinit të Bardhë. Këtë hamendje e mbështesin edhe fakte të tjera. Po ashtu në tokat e njohura me emrat Plehnishta dhe Deliçina, jo larg urës në fjalë, janë gjetur nga fshatarët gjurmë trojesh të vjetra dhe fragmente enësh prej qeramike.
Referime[Redakto | Redakto nëpërmjet kodit]
- ^ LISTA E TRASHËGIMISË KULTURORE PËR MBROJTJE TË PËRKOHSHME (PDF). Republika e Kosovës, Ministria e Kulturës, Rinisë dhe Sportit. Marrë më 17 gusht 2016.
Lidhje të jashtme[Redakto | Redakto nëpërmjet kodit]
- Databaza e trashëgimisë kulturore të Kosovës Arkivuar 26 mars 2016 tek Wayback Machine
 | Ky artikull për historinë e Kosovës është i cunguar. Ju mund të ndihmoni Wikipedian duke e zgjeruar atë. |