Bardhyl Musai

Bardhyl Musai (1955, Lushnje) është profesor universitar shqiptar, ekspert i arsimit dhe ish rektor i Universitetit të Elbasanit.

Biografia

Bardhyl Musai lindi në Lushnje. Studioi për matematikë dhe fizikë në Universitetin e Elbasanit dhe kreu kursin pasuniversitar për psikologji e pedagogji në Universitetin e Tiranës, ku edhe doktoroi. Për qëllime specializimi qëndroi në Universitetin Swansea, Uells, në Universitetin e Hapur Milton Keynes, në Angli dhe në Universitetin e Edinburgut, Skoci. Ishte mësues, drejtor shkolle, këshilltar dhe inspektor arsimi, profesor dhe përgjegjës i departamentit të psikologjisë dhe edukimit e më pas edhe rektor i Universitetit të Elbasanit. Është profesor në Universitetin e Tiranës dhe drejtor ekzekutiv i Qendrës së Arsimit Demokratik në Tiranë. Mbajti mësim edhe në Universitetin e Prishtinës, Tetovës, Korçës, Pogradecit etj. Ishte edhe këshilltar i kryeministrit të Shqipërisë, kryetar i Këshillit të Akreditimit të Arsimit të Lartë, anëtar i Këshillit të Arsimit të Lartë dhe Shkencës dhe i Këshillit të Arsimit Parauniversitar në Ministrinë e Arsimit. Ekspertiza e tij në fushën e arsimit ka të bëjë me përgatitjen dhe trajnimin e mësuesve, me drejtimin dhe administrimin e arsimit, me politikat arsimore, në nivelin parauniversitar dhe universitar. Ka drejtuar disa projekte me karakter kombëtar e rajonal. Botoi një sërë studimesh dhe artikuj me karakter hulumtues e profesional, në gjuhën shqipe dhe në atë angleze.

Publikime

• "Metodologjia e mësimdhënies" (2003),
• "Mjeshtritë themelore të mësimdhënies" (1996),
• "Psikologji edukimi" (1999),
• "Mësimdhënia dhe të nxënët ndërveprues",
• "Si të shkruajmë ese" (2004),
• "Arsimi në demokracinë e brishtë" (2020)

Shih edhe

• Arsimi në Shqipëri