Pavllo Gjidede

Pavllo Gjidede (14 maj 1937 - 9 maj 2013) ishte arsimtar, shkrimtar, publicist dhe gazetar-redaktor i gazetës "Zëri i popullit".

Pavllo Gjidede
U lind më	(1937-05-14)14 maj 1937 Ilias, Himarë, Shqipëri
Vdiq më	9 maj 2013(2013-05-09) (75 vjeç) Tiranë, Shqipëri
Kombësia	Shqiptar
Edukimi	Universiteti i Tiranës
Gjinitë letrare	publicist, biograf, prozator, skenarist
Punët e shquara	"Nga Gorbaçovi tek Ramiz Alia" "Lamtumirë çajka ime!" "Dashuri dhe plumba"

Jeta

Lindur në fshatin Ilias, pranë fshatit Vuno të Himarës, shkollën fillore e kreu në fshat dhe atë shtatëvjeçare në Dhërmi deri më 1953. Shkollën e mesme e filloi në shkollën ushtarake "Skënderbej" në Tiranë e më pas në gjimnazin "Asim Zeneli" të Gjirokastrës.

Studimet e larta i përfundoi në Fakultetin Histori-Filologji të Universitetit të Tiranës, ku u diplomua për gjuhë ruse dhe gjuhë-letërsi shqipe. U specializua për filozofi dhe mbrojti gradën "Doktor i shkencave filozofike". Për një kohë punoi mësues dhe pedagog i gjuhës ruse dhe i letërsisë shqipe. Përgjatë kësaj kohe iu përkushtua mbledhjes së të dhënave të folklorit në shumë krahina të Shqipërisë.

Në fushën e gazetarisë dhe publicistikës hyri në gjysmën e dytë të viteve '60-të, si korrespondent i së përditshmes "Zëri i popullit" për zonën Vlorë-Fier. Më 1972 u transferua në Tiranë, në redaksinë e gazetës "Zëri i popullit", në fillim si korrespondent për rajonin e Tiranës, më pas redaktor dhe përgjegjës i sektorit publik. Në vitet 1979-1983 ishte sekretar i kolegjiumit të revistës "Studime politiko-shoqërore" dhe nga viti 1984 deri më 1987 drejtor i Shtëpisë Botuese "8 Nëntori".

Më pas u rikthye sërish në gazetën "Zëri i popullit" si gazetar-redaktor përgjegjës i sektorit të çështjeve politiko-shoqërore, ndërsa në vitet 1991-1996 ishte korrespondent i kësaj gazete në Sofje, Bullgari. Në vitin 1999 u caktuar kryeredaktor i gazetës "E ardhmja".

Krijimtaria

Në veprën e tij lëvroi tre grupllojet e shkrimeve gazetareske e publicistike, atë informative, analitike dhe letraro-publicistike, përshkrimin, artikullin publicistik dhe editorialin. Krahas punës në lëmin e gazetarisë, ka qenë gjithashtu bashkëpunëtor i jashtëm i Institutit të Kulturës Popullore dhe Institutit të Gjuhësisë e Letërsisë .

Tituj të veprave

• Fletë nga një ditar, 1980;
• Midis nëntë maleve: portrete dhe reportazhe letrare, 1977;
• Pas-al-kontroll, 2013;
• Zaho Koka: Hero i Popullit, 1969;
• Nga Gorbaçovi te Ramiz Alia, 2000;
• Dashuri dhe plumba, 2002;
• Lamtumirë çajka ime!, 2006;
• Çajka dhe trëndafili i bardhë, 2013;
• Raisa Gorbaçova (pelegrine e paqes), 2013;
• Pranverë vrastare, 2015;
• Këngë arvanite, 2012;
• Shtegëtim në lashtësi, 2013;
• Më lër të tregoj: Përralla popullore (3 vëllime), 2013;
• Studime folklorike;
• Studime etnografike;
• Prozë e artë popullore;
• Legjenda, proverba dhe gjëegjëza, 2012;
• Fjalor i fjalës së rrallë;
• Legjenda himariote;
• Rrugë të mbarë nëpër Vlorë!;
• Sentimente dhe ndryshe, 2013;
• Brunhilda, dashuri e vrarë;
• Intervistë me vetveten;
• Nostalgjikë dhe të përmalluar;
• Përse kaq urrejtje në "ndershmërinë e re"?;
• E bukura e dheut, 2013;

Skenare dokumentarësh

• Nëpër Turqi me ansamblin e këngëve dhe valleve, Kinostudio “Shqipëria e re” (1979)
• Blerim në bregdet, Kinostudio “Shqipëria e re” (1982)