Lagjja e Masuricës

Lagjja e Masuricës, lagje kryesisht rome, në pjesën perëndimore të qytetit, në vazhdim të Baqevinës, përballë Parkut të qytetit, në hapësirën mes rrugëve Xhemajl Mustafa dhe Komandant Remi. Aty janë vendosur romët myslimanë të ardhur nga fshati Masuricë i rrethit të Vranjës. Një pjesë e tyre janë vendosur edhe në anën e kundërt të rrugës, në hapësirën skaj varrezave të qendrës, kurse më vonë aty janë vendosur edhe familje të tjera rome, myslimane, muhaxhire, të ardhur pas vitit 1877/78, nga Vranja, Leskovci, Nishi, e Prokupla, të cilat kanë formuar lagjen e tanishme Kamnik-Iliria, lagje të cilën e ndan në dy pjesë rruga e tanishme Elez Agushi.