Mbretëresha e dëborës (film)

Mbretëresha e dëborës
Logoja e filmit
Regjia nga	Chris Buck Jennifer Lee
Shkruar nga	Chris Buck Jennifer Lee Shane Morris
Bazuar në	Mbretëresha e dëborës nga Hans Christian Andersen
Prodhuesi	Peter Del Vecho
Luajnë	Kristen Bell Idina Menzel Jonathan Groff Josh Gad Santino Fontana
Kinematografia	Jennifer Lee
Montazhi	Jeff Draheim
Muzika	Christophe Beck
Kompanitë prodhuese	Walt Disney Pictures Walt Disney Animation Studios
Shpërndarë nga	Walt Disney Studios Motion Pictures
Data e publikimit	27 nëntor 2013 (SHBA) 12 dhjetor 2013 (Shqipëri)
Kohëzgjatja	102 minuta
Shteti	Shtetet e Bashkuara të Amerikës
Gjuha	Anglisht
Buxheti	150 milionë dollarë
Fitimi	1.280 miliardë dollarë

Mbretëresha e dëborës (titulli origjinal: Frozen) është një film i animuar 3D, prodhuar nga Walt Disney Animation Studios dhe shpërndarë nga Walt Disney Pictures. Është filmi i 53-të i animuar nga kompania e Walt Disney, i inspiruar nga përralla "Mbretëresha e dëborës" nga Hans Christian Andersen. Shumë kritikë filmash e konsiderojnë Frozen si filmin më të mirë të animuar nga Disney që prej atyre të periudhës së renesancës. Filmi pati një sukses shumë të madh edhe në treg; grumbulloi afro 1.3 miliardë dollarë nga fitimet botërore, që e bën atë filmin me fitimet më të larta të të gjitha kohërave, njëkohësisht dhe më të shiturin.

Përmbajtja

Elsa, princesha e Arendelës, zotëron fuqi magjike me të cilat mund të krijojë apo kontrollojë akullin dhe dëborën. Një natë, ajo pa dashje plagos motrën e saj të vogël, Anën, gjersa ato po luanin. Prindërit e tyre të tronditur, mbreti dhe mbretëresha, kërkojnë ndihmë nga mbreti troll, i cili e shëron Anën dhe i'a largon kujtimet për magjitë e Elsës. Ata i izolojnë fëmijët e tyre në kështjellë, derisa Elsa të mësojë t'i kontrollojë fuqitë e saj magjike. E frikësuar mos lëndon Anën përsëri, Elsa kalon shumicën e kohës së saj e vetme në dhomë, dhe gjersa ato rriten, ndahen gjithnjë e më tepër nga njëra-tjetra, ndërkaq prindërit e tyre vdesin në det gjatë një stuhie.

Kur Elsa mbush moshën, e gjithë mbretëria fillon përgatitjet për ditën e kurorëzimit. Në mesin e të ftuarve, është edhe Duka i Ueselltonit, i cili synon ta shfrytëzojë Arendelën për përfitime personale. Princeshë Ana, e emocionuar që i lejohet të dalë jashtë kështjellës, eksploron qytetin dhe takon Princin Hans nga Ishujt Jugorë, të cilët menjëherë krijojnë një simpati mes vete. Pavarësisht brengosjes së Elsës, kurorëzimi i saj kalon pa ndonjë incident. Gjatë gostisë, Hansi i propozon Anës për martesë, e cila pranon menjëherë. Mirëpo Elsa refuzon të japë bekimin e saj dhe ndalon martesën e tyre të befasishme. Dy motrat fjalosen, dhe nga zemërimi, Elsa çliron fuqitë e saj para të gjithë të pranishmëve.

E mbërthyer nga paniku, Elsa largohet nga kështjella duke lëshuar nga pas një dimër të përjetshëm në mbretëri. Lart mbi male, ajo lë vetëpërmbajtjen e saj, betohet se nuk do kthehet më kurrë dhe ndërton një kështjellë akulli të vetmuar. Ndërkohë, Ana niset për ta kërkuar atë, ta kthejë sërish në Arendel dhe ta ndalojë dimrin. Gjatë udhëtimit, Ana takon një shitës akulli të quajtur Kristof dhe drerin e tij Sven dhe e bindë atë që ta shoqërojë deri në Malin e Veriut. Gjatë rrugës, grupi takohet me Olafin, një plak dëbore që Ana dhe Elsa e kishin ndërtuar në fëmijëri.

Ana dhe Elsa bashkohen përsëri, por Elsa akoma frikësohet mos e lëndon atë. Kur Ana insiston që Elsa të kthehet, ajo aksidentalisht sulmon Anën duke e goditur në zemër me fuqitë e saj. E tmerruar, Elsa i detyron Anën, Kristofin dhe Olafin të largohen duke krijuar një krijesë gjigante, që i ndjek ata jashtë pallatit. Gjersa ata largohen, Kristofi vëren se flokët e Anës po zbardheshin dhe mendon se diçka nuk shkon. Ai kërkon ndihmë nga trollët, familja adoptuese e tij, të cilët sqarojnë se si zemra e Anës është ngrirë nga Elsa dhe vetëm një "akt i dashurisë së vërtetë" mund ta shkrijë, përndryshe ajo do kthehet në gur të ngrirë përgjithmonë. Duke menduar se vetëm Hansi mund ta shpëtojë atë përmes puthjes së dashurisë së vërtetë, Kristofi e kthen përsëri në Arendel.

Ndërkohë, Hansi arrin ta gjejë pallatin e Elsës. Gjatë betejës kundër ushtarëve të Dukës, Elsa humbë ndjenjat nga një llambadar që i bie dhe burgoset në Arendel. Atje, Hansi i kërkon Elsës që ta largojë dimrin, por ajo ia pranon që nuk mundet. Kur Ana bashkohet me Hansin dhe i lutet atij që ta puthë për ta thyer mallkimin, Hansi refuzon dhe demaskohet para saj, duke i thënë se qëllimi i vërtetë i martesës ishte që ta merrte fronin mbretëror.

Elsa arratiset drejt stuhisë në fjord. Ndërkaq, Olafi zbulon se Kristofi është në dashuri me Anën dhe të dy drejtohen për në fjord për ta gjetur atë. Hansi përballet me Elsën, duke i thënë se Ana ka vdekur për shkak të saj. Për shkak të dëshpërimit të Elsës, stuhia ndalon, dhe kështu Kristofit dhe Anës u jepet mundësi për ta gjetur vendndodhjen e njëri-tjetrit. Megjithatë, Ana e sheh Hansin duke u përpjekur ta vrasë Elsën, dhe futet në mes për ta shpëtuar. Në atë çast ajo ngrin dhe kështu bllokon sulmin e Hansit.

Në çastin kur Elsa fillon të vajtojë të motrën, Ana fillon të shkrijë, pasiqë vendimi i saj për ta sakrifikuar veten për ta shpëtuar të motrën formon "aktin e dashurisë së vërtetë". Elsa kupton se dashuria është çelësi për të kontrolluar fuqitë e saj, sjell verën në mbretëri dhe bën që Olafi të mund të mbijetojë në verë. Hansi dëbohet për në Ishujt Jugorë për shkak të krimeve që ka kryer ndaj familjes mbretërore të Arendelës, dhe Elsa ndalon tregtinë me Dukën e Ueselltonit. Dy motrat pajtohen sërish dhe Elsa premton se portat e kështjellës nuk do të mbyllen më kurrë.

Zërat

Roli	Zëri në origjinal	Dubluar në shqip
Ana	Kristen Bell	Klodiana Keco Alma Koleci (këngë)
Elsa	Idina Menzel	Suela Xhonuzi Antonela Çekixhi (këngë)
Kristofi	Jonathan Groff	Genti Deçka
Olafi	Josh Gad	Ilir Muhametaj
Hansi	Santino Fontana	Ilir Kazaferi Alfred Meço (këngë)
Duka i Ueselltonit	Alan Tudyk	Xhelil Aliu
Pabi	Ciarán Hinds	Gëzim Rudi

Sequel

Më 13 mars 2015, u dha premiera e filmit me metrazh të shkurtër, Frozen Fever së bashku me filmin Hirushja. Më 12 mars, 2015, është bërë i ditur lajmi se kanë filluar punimet për pjesën e dytë Frozen 2, ku Buck dhe Lee rikthehen si regjisorë dhe Peter Del Velcho si producent, por data e lëshimit nuk është zbuluar ende.

Lidhje të jashtme

• Mbretëresha e dëborës në Internet Movie Database

• Faqja zyrtare