Shpend Ahmeti

Shpend Ahmeti
Kryetari i Prishtinës
Në detyrë 26 dhjetor 2013 – 7 dhjetor 2021
Zëvendës	Dardan Sejdiu (2014–2017) Selim Pacolli (2017–2021)
Paraprirë nga	Isa Mustafa
Pasuar nga	Përparim Rama
Kryetari Partisë Socialdemokrate
Në detyrë 9 maj 2018 – 15 dhjetor 2019
Paraprirë nga	Bajram Kelmendi
Pasuar nga	Dardan Molliqaj
Zëvendës i kryetarit të Vetëvendosjes
Në detyrë 31 mars 2011 – 7 mars 2018
Kryetari i Partisë Fryma e Re
Në detyrë 5 nëntor 2010 – 31 mars 2011
Paraprirë nga	Zyra u themelua
Pasuar nga	Zyra u shfuqizua
Të dhëna vetjake
U lind më	18 prill 1978 Prishtinë, Kosovë
Partia politike	Partia Socialdemokrate e Kosovës (2018–2019)
Lidhjet e tjera politike	Lëvizja Vetëvendosje (2011–2018) Fryma e Re (2010–2011)
Bashkëshortja/et	Ardiana Gjinolli-Ahmeti
Fëmijët	2
Shkollimi	Universitet Amerikan në Bullgari Universiteti i Harvardity (M.P.A.)
Nënshkrimi

Shpend Ali Ahmeti (lindi më 18 prill 1978) është një politikan kosovar që ka shërbyer si kryetar i Prishtinës. Ai ishte kryetari i Partisë Fryma e Re, e cila u shkri në Vetëvendosje në vitin 2011 dhe shërbeu si nënkryetar i tyre. Megjithatë, pas mosmarrëveshjeve të brendshme ai u largua nga partia në vitin 2018 për t'u bërë kryetar i Partisë Socialdemokrate të Kosovës. Në vitin 2019 ai u bë një politikan i pavarur.

Ahmeti morri pjesë në zgjedhjet e 3 nëntorit 2013 për kryetar të Prishtinës, ku në raundin e parë të zgjedhjeve, Ahmeti ishte rreth 8000 vota prapa Isa Mustafës, por në raundin e dytë më 1 dhjetor 2013 ai fitoi me rreth 2500 vota. Mustafa akuzoi Ahmetin për mashtrim. Fitorja e Ahmetit u konfirmua më pas duke i dhënë fund mandatit 15 vjeçar të LDK-së në kryeqytetin e Kosovës.

Në tetor 2017 ai kandidoi sërish për zgjedhjet lokale si kandidat i Vetëvendosjes dhe me sukses arriti të mbajë postin e tij si kryetar i Prishtinës.

Arsimi

Studimet universitare i ka filluar më 1996 në Universitetin Amerikan të Bullgarisë (AUBG) për ekonomi dhe administrim biznesi, duke u specializuar në ekonomi të aplikuar dhe administrim biznesi. Ka përfunduar studimet master në politika publike më 2004 në Universitetin e Harvardit, duke u specializuar në zhvillimin politik dhe ekonomik.

Gjatë kohës së studimeve në AUBG, Ahmeti ishte senator dhe më pas kryetar i qeverisë studentore atje, si dhe udhëheqës i komuniteteve të ndryshme (nga më shumë se dhjetë vende) përgjatë një periudhe të reformave në universitet.

Prej vitit 2005 Shpendi është ligjërues i politikave publike dhe politikave ekonomike ndërkombëtare në Universitetin Amerikan të Kosovës (AUK).

Politika

Shpend Ahmeti u zgjodh kryetar i Komunës së Prishtinës me balotazhin e 1 dhjetorit të vitit 2013 ku ai mori rreth 2500 vota më shumë se paraardhësi i tij Isa Mustafa ndërsa fitoi mandatin e dytë më 2017 poashtu në balotazh.

Gjatë periudhës 2011-2018 ishte nënkryetar i Lëvizja Vetëvendosje, i zgjedhur nga Këshilli i Përgjithshëm. Ai u tërhoq nga nga Vetëvendosje më 7 mars 2018.

Përveç shqipes, Ahmeti flet edhe gjuhën angleze, serbo-kroate, maqedone, bullgare dhe ka njohuri të gjuhës gjermane.

Çmimet

Me janar të 2015-ës, Ahmeti është zgjedhur kryetari më i mirë bashkiak në botë për atë muaj sipas Citymayors. Në rubrikën e kësaj organizate "Kryetari i Muajit" për këtë muaj e ka zgjedhur Ahmetin. “Zgjidhja e Shpend Ahmetit në krye të Prishtinës ishte një ndryshim i madh. Ahmeti e ka rrëzuar nga pushteti një prej liderëve më të mëdhenj të Kosovës, partia e të cilit kishte udhëhequr 14 vite pas luftës. Ahmeti e përfaqëson Vetëvendosjen, një parti politike e formuar në vitin 2005”, shkruan ndër të tjera “CityMayor”.

Ahmeti është fitues i disa çmimeve e shpërblimeve si World Bank Spot Award dhe i atij në European Debating Championships.

Jeta private

Ahmeti jeton në Prishtinë me bashkëshorten Ardiana Gjinolli dhe dy fëmijëve të tyre, Tean dhe Anrin.