Jump to content

Curzon Hall

Coordinates: 23°43′39″N 90°24′07″E / 23.727389°N 90.401902°E / 23.727389; 90.401902
Nga Wikipedia, enciklopedia e lirë
Curzon Hall
স্মৃতির কার্জন.jpg
Pamje ballore, Dep. i Fizikës
Informacion i përgjithshëm
StatusiUniversitet
VendndodhjaShahbag Thana, Dhaka
ShtetiBangladesh
Koordinatat23°43′39″N 90°24′07″E / 23.727389°N 90.401902°E / 23.727389; 90.401902
Ndërtimi filloi19 shkurt 1904
PronarUniversiteti i Dhakës

Curzon Hall është një ndërtesë e periudhës koloniale britanike që shërben si Fakulteti i Shkencave të Universitetit të Dhakës, i vendosur në Shahbag. [1]

Ndërtesa fillimisht shërbeu si selia qeveritare e qendrës së provincës së Bengalit Lindor dhe Assamit 1905-1911. Ajo është emërtuar sipas Lord Curzon-it, nënmbretit të Indisë, që vendosi gurin e saj të themelit në 1904.[1] Që nga krijimi i Universitetit të Dhakës në 1921, ai shërbeu si Fakulteti i Shkencave.

Historia[Redakto | Redakto nëpërmjet kodit]

Më 19 shkurt 1904, - Lord George Nathaniel Curzon (Lord Curzon), nënmbreti dhe guvernatori i përgjithshëm i Indisë, vendosi gurin e themeleve të kësaj ndërtese, që u emërtua sipas tij, 'Curzon Hall'. Pas shpalljes së ndarjes së Bengalit (1905-1911]]) në 16 tetor 1905, rëndësia e ndërtesave në zonën Ramna u rrit për shkak të kthimit të Dhakës në kryeqytet të Bengalit Lindor dhe Assamit. Curzon Hall shërbeu si seli e zyrës provinciale të qeverisë. Për të përgatitur kryeqytetin provincial, administrimi kolonial bleu terrene të gjera në zonën e gjelbër Ramna përtej rrethinës veriore të Dhakës, të kufizuar nga linja e atëhershme hekurudhore.

Megjithëse Guvernatori i Përgjithshëm i Indisë, George Nathaniel Curzon (1899-1905) kish deklaruar se synohej administrimi më efektiv, qëllimi i ndarjes ishte se autonomia politike e myslimanëve të Bengalit Lindor do të barazpeshonte fuqinë në rritje të hinduve në Bengalin Perëndimor. Shumë hindu e panë ndarjen si një politikë "përça e sundo". Myslimanët nga ana tjetër, e mirëpritën atë si një mundësi të për zhvillimin e rajonit, pasi prej kohe ankoheshin se Bengali ishte i mbizotëruar nga hindut dhe qendra e tij, Kalkuta u zhvillua si metropol në kurriz të Bengalit Lindor.[2]

Ahmad Hasan Dani, autor i "Dacca: A Record of Its Changing Fortunes" (1956), pohon se Curzon Hall-i filliminsht u ndërtua si një bashki e qytetit për administratën koloniale. Por sipas historianit Sharifudin Ahmed, ajo u ndërtua si një bibliotekë për Dhaka College.[3] Qëllimi i ndërtimit mbetet akoma i diskutuar.

Pamje panoramike e kompleksit

Ndërtesën e financuan xhamindarët e Bhavalit, një zonë në distriktin lindor të Dhakës, në Bengalin britanik. Me rastin e mbërritjes së guvernatorit, ata dhuruan 150 mijë rupi për ndërtimin e një biblioteke të përgjithshme të emërtuar 'Curzon Hall' në zonën Ramna për të nderuar Lord Curzon-in.[3] Ata ishin të etur për t'ju bashkangjitur programeve zhvilluese të Lord Curzon-it për kryeqytetin e ri dhe të vinin më në pah vlerat e tyre.[2] 'The Dhaka Prakash' i 1904-ës shkroi: "Dhaka College do të zhvendoset te 'Nimtoli'. Drejtori i nderuar Dr. Roy ishte i kujdesshëm të ndërtonte një bibliotekë të lidhur me këtë kolegj."[3]

Pamje e Dep. të Farmacisë

Si pasojë e statusit të ri si kryeqytet i Bengalit Lindor në Dhaka u përmirësua arkitektura dhe infrastruktura urbane. Ky zhvillin në Ramna ndihmoi të zbuste pamjen e mjeruar të Dhakës, siç është përshkruar në një raport të "The Times of London" në 1909: "Për shumë vite Dhaka ka qenë parë si shpina e përtejshme, një vend i zbrazur nga ndonjë kënaqësi në mërgim …Mjerimi, shpenzimet, largësia e stacionit ishin mjaft për të bërë atë të neveritshme për shumicën e anglezëve, të cilët fati i ka vendosur në Indi".[2]

Pati investime të konsiderueshme në infrastrukturën e qytetit, duke përfshirë: sistemin e administrimit të mbetjeve, menaxhimin e ujërave, ndriçimin rrugor, sistemin e kanalizimeve dhe përmirësimin e rrugëve. Në lagjen Ramna u ndërtuan një numër i rëndësishëm godinash për zyra qeveritare, arsimore dhe rezidenciale. Dy ndërtesat më ambicioze arkitekturore të ndërtuara aty ishin 'Curzon Hall' dhe Government House (tani Gjykata e Lartë e Dhakës).[2]

Pas anullimit të ndarjes së Bengalit në 1911, klasat e Dhaka College-it u vendosën te 'Curzon Hall-i'. Më vonë, kur u krijua Universiteti i Dhakës në 1921, Curzon Hall-i u përfshi si Fakulteti i Shkencave të Universitetit të Dhakës.

Pamje sallës së madhe qëndrore, ku jepen provimet

Pas ndarjes së Indisë në 1947 që krijoi shtetin e Pakistanit, gjuha urdu ishte përzgjedhur të ishte gjuha e vetme zyrtare. Asambleja e Universitetit të Dhakës u zhvillua më 24 mars 1948. Kryeministri i atëhershëm i Pakistanit Mohamad Ali Xhinah erdhi në Dhaka dhe në një takim të mbajtur në 'Curzon Hall', ai shpalli me krenari se gjuha urdu do të ishte gjuha e vetme zyrtare e Pakistanit. Studentët e mbledhur e kundërshtuan, dhe që atëherë emri i Curzon Hall u lidh me "Lëvizjen për Gjuhën Bengale".[1] Studentët e Universitetit të Dhakës e kundërshtuan që në fillim politikën shtetërore të gjuhës.[4]

Gjatë "Lëvizjes për Gjuhën Bengale", 1948–1956, Curzon Hall-i ishte vendi i ngjarjeve të ndryshme të rëndësishme. Në 1948, Asambleja Kushtetuese e Pakistanit vendosi gjuhën urdu dhe anglishten si gjuhët e vetme për tu përdorur në asamble. Kjo u kundërshtua brenda asamblesë pasi shumica e popullsisë së Bangladeshit fliste bangla dhe jo urdu.[4]

Curzon Hall-i është një strukturë që ka një një histori mahnitëse arsimore, politike dhe arkitekturore. Ai ishte i rëndësishëm në shumë beteja politike dhe sot është një pjesë vitale e traditës arsimore. Struktura e tij masive qëndron si një monument i trashëgimisë arsimore dhe historike të qytetit.[5]

Pamje anësore e Curzon Hall

Arkitektura[Redakto | Redakto nëpërmjet kodit]

Është një nga shembujt më të bukur të Arkitekturës së Dhakës. Ndërtesa dy-katëshe përfaqëson një stil të përzier të elementeve arkitekturore evropiane dhe indiane, që njihet si stili Indo-Saraçen, Indo-Evropian ose Mogul-Gotik. Ky stil ishte popullor zgrip të shekujve të XIX dhe XX në Indinë koloniale.[1] Ndërtesat bashkëkohore gjetkë në Indi, si "Taj Mahal Hotel" në Mumbai (1904) dhe Stacioni Hovrah në Kalkuta (1900-1908) shfaqin një përzierje të ngjashme të elementeve arkitekturore. Ndërtesa imponuese përfaqëson përpjekjen e administrimit kolonial për të përfshirë elemente të arkitekturës 'vendore' për të treguar ndjeshmërinë e tij ndaj kulturës vendase, që ata shpresonin se do të zbuste ndjenjat nacionaliste mes tyre.[2]

Stili kombinon artin tradicional me atë modern nëpërmjet funksioneve dhe formave të parapëlqyera mogule, si harqet dhe kupolat, që besohet se kanë hyrë në botën islamike nga perëndimi. Ndërsa planimetria e Curzon Hall-it tregon ndjeshmërinë hapsinore evropiane, eksteriori i tij të sjell në mendje Arkitekturën Mogule. Ai shënon lënien pas të Kryengritjes së Sepojve në 1857, dhe hyrjen e drejtpërdrejtë të Indisë nën kurorën britanike, duke kërkuar legjitimim nëpërmjet lidhjes me mogulët. Ngjyra e kuqe e errët e tullave zëvendëson gurin e kuq ranor të mogulëve. Çhatrit, një motiv tipik mogul, përcakton pamjen e Curzon Hall-it, siç shfaqet te Varri i Humajunit dhe Fortesa e kuqe në Delhi; Taxh Mahali dhe Varri i Itmad-ud-Daulah-ut në Agra; dhe Divani-i-Khasi në Fatehpur Sikri.[3] Konsujt e zbukuruar, strehët e thella dhe kupolat e taracës, veçanërisht të seksionit të mezit janë përkujtues të Divan-i-Khasit të vogël por të mirënjohur në fortesën pallat të Fatehpur Sikrit, kryeqyteti i perandorit Akbar midis 1570 dhe 1585. Ashtu si te Varri i Itmad-ud-Daulah-ut, balustradat e Curzon Hall-it paraqesin xhali dekorativë (thurje-rrjetësore të ndërlikuara zbukuruese) dhe ngrihet mbi korniza me konsuj të zbukuruar. Veranda të shumta gjenden përreth ndërtesës, duke mundësuar një hapsirë të tërhequr dhe duke i mbrojtur dhomat e brendshme nga shirat musonikë. Zgjedhja e qëllimshme e stilit të Fatehpur Sikrit mund të shpjegohet me faktin se britanikët parapëlqenin Akbarin si më i dituri dhe toleranti nga mogulët, duke ushqyer idealin e rolit të tyre në Indi.[1]

Pamje e Dep. të Kimisë

Kompozimi i ndërtesës së drejtuar nga veriu është simetrik: Një sallë e madhe qendrore e anash-shoqëruar nga krahë linearë në të dy anët, mbarojnë me forma drejtkëndore. Holli qëndror tre-katësh me kolonada është fokusi i planit dhe i aksesueshëm nga të gjitha anët. Llozhat përfshijnë interierin e hollit në katin e dytë dhe të tretë. Tavani zbukurohet nga panele katrore me ngjyra. Hyrja shënohet nga një kullë e lartë dhe e dalë që duket se kompenson mungesën e një kupole. Kulla ka tre dritare të larta me harqe patkua, të kornizuara brenda një kamareje. Çhatrit e lartë kurorëzojnë kullën në të katërt këndet, ndërsa ndërmjet shfaqen tre çhatri më të vegjël në çdo anë. I vendosur në hapësirën e gjelbër dhe të mirëmbajtur të kopshtit botanik, kjo ndërtesë dy-katëshe me tulla ka një sallë qëndrore të madhe, krahët anësorë në lindje dhe në perëndim me mjaft dhoma, dhe veranda të shumta në të gjitha anët.[3] Lartësimi i Curzon Hall-it, me një larmi shtyllash, kamaresh, panelesh, dritaresh me qemer, strehët dhe çhatrit, të japin një ndjesi mbresëlënëse. Duke u ngritur mes kopështit të harlisur të Ramnas, ai shfaq madhështinë e tij të qetë.[2]

Kopështi Botanik i universitetit është i vendosur në mjedisin rrethues të Curzon Hall-it. Ai është përdorur nga studentët dhe fakulteti për studimin shkencor të botanikës me bimët.[6] Përmes gjelbërimit të kopështit kolon rruga nga perëndimi në lindje. Mbrapa tij ndodhet një pellg i madh, në perëndim të të cilit gjendet ndërtesa kryesore e 'Sher-e-Bangla Fazlul Huq Hall-it'.

Pamje nga pellgu i mbrapëm i kompleksit

Curzon Hall-i përdoret si një nga ndërtesat kryesore të Universitetit të Dhakës, ku ndodhen shumica e departamenteve të Fakultetit të Shkencave. Ai është i vendosur në anën jugore të ndërtesës së Gjykatës së Lartë. Këndi qëndror i lojërave të Universitetit të Dhakës ndodhet në anën perëndimore të ndërtesës, ndërsa 'Shahidullah Hall-i' ndodhet në jug. Përreth Curzon Hall-it ndodhen "Mauzoleu i Tre Udhëheqësve" dhe Porta e Dhakës. Të tëra strukturat përreth Curzon Hall janë përkujtuese të zhvillimit të qytetit.[5]

Në këtë ndërtesë ndodhet një sallë e stërmadhe qëndrore. Ngjyra e jashtme është e kuqe e errët nga tullat e përdorura në eksteriorin e ndërtesës. Përkrahë Curzon Hall-it ndodhet varri i gjuhëtarit Muhamad Shahidullah.

Megjithëse tanshmë Curzon Hall përdoret si mjedis akademik i universitetit, ai është gjithashtu një qendër rekreacionale për vizitorët vendas dhe të huaj. Çdo mbasdite, mijëra studentë dhe shijues të zbavitjes mblidhen aty. Në mes të zhurmës së kryeqytetit, në Curzon Hall-in e mbushur me gjelbërim mund të shijosh natyrën.[7]

Shiko edhe[Redakto | Redakto nëpërmjet kodit]

Referime[Redakto | Redakto nëpërmjet kodit]

  1. ^ a b c d e Perween Hasan (17 qershor 2021). "Curzon Hall". përmbledhur nga Sirajul Islam; Ahmed A. Jamal (red.). Banglapedia: National Encyclopedia of Bangladesh (në anglisht) (bot. 2). Asiatic Society of Bangladesh. Marrë më 28 maj 2024.
  2. ^ a b c d e f Adnan Zillur Morshed (24 korrik 2018). "Want to Understand the Partition of Bengal, Visit Curzon Hall". The Daily Star (në anglisht). Marrë më 28 maj 2024.
  3. ^ a b c d e "ঐতিহ্যের প্রতীক কার্জন হল (shqip: Curzon Hall është një simbol i trashëgimisë)". Daily Sangram (në bengalisht). 23 gusht 2014. Arkivuar nga origjinali më 5 mars 2016. Marrë më 28 maj 2024.
  4. ^ a b Bashir Al Helal (2012). "Language Movement". përmbledhur nga Sirajul Islam; Ahmed A. Jamal (red.). Banglapedia: National Encyclopedia of Bangladesh (në anglisht) (bot. 2). Asiatic Society of Bangladesh.
  5. ^ a b "The Beautiful Curzon Hall". Heritages of Bangladesh (në anglisht). Marrë më 28 maj 2024.
  6. ^ Zia Uddin Ahmed (2021). "Botanical Garden". përmbledhur nga Sirajul Islam; Ahmed A. Jamal (red.). Banglapedia: National Encyclopedia of Bangladesh (në anglisht) (bot. 2). Asiatic Society of Bangladesh. Marrë më 28 maj 2024.
  7. ^ Imadul Haque (13 korrik 2013). "ঢাকা বিশ্ববিদ্যালয়: ঐতিহ্যবাহী কার্জন হল (shqip: Universiteti i Dhakës: Curzon Hall)" (në bengalisht). Amar Desh publications Ltd. Arkivuar nga origjinali më 18 korrik 2013. Marrë më 28 maj 2024.
Marrë nga "https://sq.wikipedia.org/w/index.php?title=Curzon_Hall&oldid=2667053"