Lufta e Trojës

Nga Wikipedia, enciklopedia e lirë
Shko te: navigacion, kërko

Në mitologjinë greke, Lufta e Trojës' u zhvillua nga Akejtë (grekët) kundër qytetit të Trojës, pasi Paridi (Princi i Trojës) mori Helenën nga Menelau, bashkëshorti i saj, mbreti i Spartës. Lufta është ndër ngjarjet më të rëndësishme në mitologjinë greke dhe është transmetuar në shumë vepra të letërsisë greke, duke përfshirë Iliadën dhe Odisenë të shkruara nga Homeri. Iliada lidhet me një pjesë të vitit të rrethimit të Trojës, ndërsa Odisea përshkruan udhëtimin e Odiseut në shtëpi, njërit nga udhëheqësit e fundit të Akejve. Pjesë të tjera të luftës janë përshkruar në një cikël poemash epike, prej të cilave kanë mbetur disa fragmente. Episode nga lufta kanë siguruar materiale për tragjedinë greke dhe vepra të tjera të letërsisë greke si dhe për poetët romakë si Virgjil dhe Ovid.

Sipas Legjendës shkaktar kryesor i kësaj lufte ishte një gosti perëndish ku nuk u ftua perëndesha e grindjes, Eris, e cila nga zemerimi mori një mollë të artë, e njohur edhe si molla e sherrit, ku ishin gdhendur fjalët Më Të Bukurës dhe e hodhi mes perëndeshave të tjera, Afërditës, Herës, Athinasë. Këto të fundit nisën një sherr të madh për të caktuar se kush ishte më e bukura. Zeusi, për tiu shmangur mërisë që mund të shkaktonte vendimi, i dërgoi perëndeshat te Paridi, të cilin perëndeshat e mbushën me premtime, nëse jua jepte mollën. Paridi i joshur nga premtimi i Afërditës për dashurinë e gruas më të bukur në botë, gjykoi se mollën duhet ta merrte Afërdita. Në shkëmbim, Afërdita e bëri Helenën, më të bukurën e të gjitha grave dhe gruaja e Menelaut, të binte në dashuri me Paridin, i cili e mori atë në Trojë. Agamemnoni, mbreti i Mikenës dhe vëllai i Menelaut, burrit të Helenës, udhëhoqi një ekspeditë të trupave greke në Trojë dhe rrethuan qytetin për dhjetë vjet për shkak të fyerjes së Paridit. Pas vdekjes së heronjve të shumtë, duke përfshirë nga grekët: Patroklin, Akilin dhe Ajaksin, ndërsa nga trojanët Hektorin dhe Priamin, qyteti ra nëpërmjet dredhisë së kalit të Trojës. Akejtë i vranë Trojanët (me përjashtim të disa grave dhe fëmijëve të cilët i mbajtën ose shitën si skllevër) dhe i vunë flakën qytetit. Pak prej grekëve u kthyen të sigurtë në shtëpitë e tyre. Romakët më vonë origjinën e tyre e gjetën te Enea, një nga trojanët, i cili thuhet të ketë udhëhequr trojanët e mbijetuar në Italinë e sotme.