Sokol Olldashi

Sokol Olldashi
Deputet i Kuvendit të Shqipërisë
Në detyrë 2001–2013
Ministër i Brendshëm i Shqipërisë
Në detyrë 10 shtator, 2005 – 18 janar 2007
Paraprirë nga	Igli Toska
Pasuar nga	Bujar Nishani
Ministër i Punëve Publike, Transportit dhe Telekomunikacionit, pas prillit 2010 Ministër i Punëve Publike dhe Transportit
Në detyrë 30 prill, 2007 – 2013
Paraprirë nga	Lulzim Basha
Pasuar nga	Edmond Haxhinasto
Të dhëna vetjake
U lind më	17 dhjetor 1972 Durrës
Vdiq më	20 nëntor 2013 Krrabë
Nënshtetësia	Shqiptar
Partia politike	PD
Bashkëshortja/et	Enkeleda Olldashi
Fëmijët	dy fëmijë
Punësimi	Politikan

Sokol Olldashi (Durrës, 17 dhjetor 1972 - 20 nëntor 2013) ka qenë deputet i Partisë Demokratike në Kuvendin e Shqipërisë dhe Ministër i Punëve Publike dhe Transportit në qeverinë shqiptare nga viti 2009 deri në vitin 2013.

Biografia

Shkollimin e mesëm e kreu në vendlindje, Durrës, ndërsa studimet e larta për drejtësi i kreu më 1995 dhe në vitin 2004 Kolegjin e Mbrojtjes, pranë Komandës së Doktrinave. Që nga koha e studimeve fillon të punojë si gazetar në Albania, Rilindja Demokratike, Agjencinë Telegrafike Shqiptare dhe bëhet kryeredaktor i televizionit ATN, pastaj zgjidhet në krye të Forumit Rinor të Partisë Demokratike dhe, në vitin 2001, zgjidhet deputet në Parlament.

Në vitin 2005 i ngarkohet detyra e Ministrit të Rendit, të cilën e dorëzoi për t'u kandiduar në postin e kryetarit të Bashkisë Tiranë më 2007. Pas "humbjes" së këtij kandidimi, nga viti 2007, mbajti postin e Ministrit të Punëve Publike, Transportit dhe Telekomunikacionit në qeverinë e Shqipërisë.

Në korrik të vitit 2013, pas humbjes së zgjedhjeve elektorale nga Partia Demokratike dhe dorëheqjes së Sali Berishës nga posti i kryetarit të partisë, ai kandidon për kryetar partie, përballë Lulzim Bashës, në zgjedhje të debatuara për moskorrektesë, dhe nuk fiton.

Ka qenë njohës i gjuhës angleze dhe italiane.

Vdekja

Më 20 nëntor 2013, Olldashi ndërroi jetë pas një aksidenti të rëndë me makinë në Krrabë. Aksidenti ndodhi në mbrëmje dhe shkak ishte terreni i lagësht dhe shpejtësia me të cilën po udhëtonte Olldashi. Makina e tij, Mercedes-Benz S Class, humbi kontrollin gjatë një kthese dhe përfundoi në humnerë, 20 metra poshtë rrugës.

Teoritë konspirative rreth vdekjes

Pas ndarjes nga jeta të deputetit dhe ish-ministrit Sokol Olldashi më 20 nëntor 2013, në një aksident automobilistik në aksin rrugor Tiranë–Elbasan, në media dhe opinionin publik janë shfaqur teori konspirative lidhur me rrethanat e vdekjes së tij. Disa komente publike dhe raportime në media sugjeruan se aksidenti mund të mos ketë qenë i rastësishëm. Këto teori u nxitën nga vonesat në publikimin e raportit zyrtar të ekspertizës, mungesa e një hetimi të thelluar, dhe rrethanat e paqarta të aksidentit, përfshirë faktin se automjeti kishte dalë nga rruga në një zonë pa sinjalistikë dhe ishte gjetur vetëm pas disa orësh.

Sipas raportimeve të medias, përfshirë “Gazeta Sot”, “Panorama” dhe “Telegrafi”, Prokuroria e Tiranës e mbylli hetimin duke e klasifikuar ngjarjen si një aksident të zakonshëm rrugor, ku shkak ishin shpejtësia e lartë, humbja e kontrollit të mjetit dhe mungesa e rripit të sigurimit. Megjithatë, disa raportime spekulative në media të tjera dhe portale online kanë përmendur hipoteza se Olldashi mund të ketë qenë viktimë e një atentati të inskenuar si aksident. Madje, janë përmendur pretendime për ekzistencën e një ekspertize alternative që do të sugjeronte ndërhyrje të qëllimshme në vendin e ngjarjes, por asnjë nga këto nuk është mbështetur me prova konkrete dhe nuk është konfirmuar nga institucionet shtetërore.

Pavarësisht këtyre spekulimeve, asnjë provë ligjore apo konkluzion hetimor i pavarur nuk ka dalë në dritë për të mbështetur zyrtarisht pretendimet për një vrasje të mundshme. Vdekja e tij mbetet zyrtarisht një aksident rrugor tragjik, por teoritë konspirative vazhdojnë të qarkullojnë në diskursin publik dhe mediatik.