Edi Rama

Nga Wikipedia, enciklopedia e lirë
Shko te: navigacion, kërko
Edi Rama
Edi Rama
Kryeministër i Shqipërisë
2013 – aktiv
Paraardhësi: Sali Berisha
Kryetar i Bashkisë Tiranë
2000 – 2011
Paraardhësi: Albert Brojka
Pasardhësi: Lulzim Basha
Ministër i Kulturës, Rinisë dhe Sporteve
1998 – 1999
Paraardhësi: Arta Dade
Pasardhësi: Esmeralda Uruçi
Kryetar i Partisë Socialiste të Shqipërisë
2005 – aktiv
Paraardhësi: Fatos Nano
Të dhënat personale
Lindi më: 4 korrik 1964
Lindi në: Tiranë
Kombësia: Shqiptar
Profesioni: Politikan, Piktor, Basketbollist
Partia politike: Partia Socialiste
Edi Rama
Edi Rama
Kryeministër i Shqipërisë


Edi Rama lindi më 4 korrik 1964 është politikan, publicist dhe piktor shqiptar, Kryetar i Partisë Socialiste të Shqipërisë dhe Kryeministër i Shqipërisë që prej vitit 2013.

Jeta dhe Karriera

Edi Rama është i biri i Skulptorit të Popullit Kristaq Rama (ish-pjesëtar i udhëheqjes së lartë komuniste në vitet 1980-të, anëtar i Presidiumit të Kuvendit Popullor të Republikës Popullore Socialiste të Shqipërisë) dhe Aneta Rama (Koleka), mbesa e Spiro Kolekës, ish anëtar i Byrosë Politike të Partisë së Punës së Shqipërisë gjatë periudhës së diktaturës komuniste.

Edi Rama është zgjedhur tre herë rresht Kryetar i Bashkisë së Tiranës. Në vitin 2000 Edi Rama kandidoi në zgjedhjet lokale në Tiranë si kandidat i pavarur por i përkrahur nga PSSH. Në kandidimin për mandatin e dytë si Kryetar Bashkie ai kandidoi si kandidat i Partisë Socialiste, ku dhe u anëtarësua në parti në vitin 2003. Në këto zgjedhje Rama fitoi 58.86% të votave [1]. Më 2004 fiton titullin “World Mayor” në faqen e internetit worldmayor.com që organizohet me votat e lexuesve të internetit duke marrë më shumë vota se kryebashkiakët e Romës, Athinës dhe Mexico City[2].

Si Kryetar Bashkie

Pasi drejtoi Bashkinë e Tiranës për 11 vjet, në zgjedhjet lokale të 8 majit 2011 Rama që kandidont për herë të katërt, humbi ndaj kandidatit në moshë të re të Partisë Demokratike, Lulzim Basha. Rama fitoi 49.7% të votave [3], pra shumë më pak se në vitin 2007. Por proçesi i shpalljes së Lulzim Bashës fitues i zgjedhjeve për Kryetar të Bashkisë të Tiranës u shoqërua me shumë polemika [4]. Rezultati paraprak jo përfundimtar, i jepte Ramës një avantazh të ngushtë prej 10 votash ndaj rivalit të tij Lulzim Basha, por gjatë numërimit të votave shumë fletë votimi për kryetarin e bashkisë ishin hedhur gabimisht në kutitë e votimit për anëtarët e këshillave bashkiake. Në ligjin e zgjedhjeve nuk kishte ndonjë përcaktim nëse këto vota duhet të quhen të pavlefshme ose të vlefshme. Duke qenë se fletët e votimit ishin të qarta dhe pa gabime Komisioni Qendror i Zgjedhjeve e pranoi kërkesën e Partisë Demokratike dhe Lëvizjes Socialiste për Integrim që këto vota të konsiderohen të vlefshme. Shumica e këtyre votave ishin për kandidatin Lulzim Basha të "Koalicionit për Qytetarin" i cili u shpall fitues me 91 vota. Në përfundim të një procesi numërimi të dyshimtë sipas drejtuesve të Partisë Socialiste por të drejtë sipas Partisë Demokratike, Lidhjes Socialiste për Integrim dhe partive të tjera të Koalicionit për Qytetarin, nga i cili rezultuan sipas Gazetës Shqip 870 fletë votimi më shumë sesa votues [5], KQZ shpalli fitues kandidatin e Partisë Demokratike Lulzim Basha me një avantazh prej 91 votash. Këto zgjedhje u quajtën nga misioni vëzhgues i OSBE-ODHIR-it si konkurruese e transparente, por tejet të polarizuara e me mungesë besimi ndërmjet partive në qeveri e opozitë[6] dhe Komisioni Qendror i Zgjedhjeve u kritikua për vendime të mara në mënyrë jokonsensuale, dhe pa një bazë të qartë ligjore [7] [8], të cilat në shumë raste krijuan përshtypjen se KQZ po favorizonte shumicën qeverisëse.

Ne vitin 2013 Edi Rama drejtoi fushatën e Partisë Socialiste me sloganin "Rilindje" dhe fitoi zgjedhjet e 23 qershorit. Koalicioni parazgjedhor i kryesuar nga PS dhe LSI fitoi 83 vende në Kuvendin e Shqipërisë (65 deputetë PS, 16 deputetë LSI, 1 deputet PBDNJ dhe 1 deputet PKDSH.

Jeta personale

Në mesin e dytë të viteve 80-të Edi Rama u njoh me Matilda Makoçin studente e Institutit të Lartë të Arteve dhe një aktore që po dominonte kinematografine shqiptare në ato vite. Ata shpallën martesën e tyre më 4 korrik të vitit 1986 dhe që nga ajo kohë filluan të jetojnë bashkë. Nga martesa e tyre lindi një djalë Gregori. Historia e tyre dukej si një histori suksesi por, pas thuajse 5 vitesh, lidhja e tyre mori fund në rrethana jo shumë të qarta që u pasuan nga një gjyq ndarjeje në fillim të vitit 1991 dhe që është përfolur gjatë më pas në karrieren politike të Edi Ramës.

I divorcuar nga Matilda Makoçi, Edi Rama të cilit kishte filluar ti pëlqente politika, shfaqet në fillim të vitit 1991 shumë shpesh në publik në shoqërine e një pedagogeje të Fakultetit të Histori - Filologjisë Delina Fico. Raporti i tij me të u bë publik rreth asaj kohe dhe çifti u lidh përmes martesës pak kohë më vonë. Kjo ishte martesa e dytë e Edi Ramës. Ata jetuan bashkë për një periudhë kohe thuajse 6-vjecare në vende të ndryshme si në Tiranë, Paris apo Gjermani. Aktivë në lëvizjet politike të kohës ata jetuan në një apartament që Edi Rama e kishte pronë të tijën në periferi të Tiranës. Asnjëhere nuk është mësuar se përse martesa e tyre mori fund.

Në prill të vitit 1998 kur mbërriti në Tiranë i thirrur nga Fatos Nano në detyrën e re të ministrit të Kulturës Rinisë dhe Sporteve Edi Rama shoqërohej nga një antropologe gjermane Caroline Hornstein me të cilën ishte njohur në Paris afro një vit më parë. Historia e tyre ishte publike dhe në maj të vitit 1998 Caroline Hornstein u vendos në Tiranë për të jetuar me Edi Ramën. Ideja e një martese mes tyre ishte mjaft e pranishme në atë kohë dhe çifti shfaqej bashkë kudo përfshi edhe ngjarjet e rëndësishme kulturore. E diplomuar në Frankfurt dhe më pas e specializuar në Boston të SHBA-së Caroline duket se u thye shpejt me bashkëshortin e ardhshëm. Nuk dihet se si marrëdhënia mes tyre bashkë me dasmën e pritshme mbaruan në verën e vitit 1999 pas një takimi të fundit mes tyre në Gjermani. Caroline nuk u kthye më në Shqipëri dhe disa vjet më vonë u martua me kryetarin e Bashkisë së Mostarit qytetit të njohur boshnjak duke u bërë Caroline Tomiç.

Mungesa e një partnereje stabël dhe jeta e tij private u bënë në shumë raste edhe objekt i kritikave dhe sulmeve politike të kundërshtarëve të tij politikë.

Në verën e vitit 1999 Edi Rama intensifikon shfaqjet në publik në shoqërinë e një prezantueseje të njohur televizive 11 vjet më e vogël se sa ai, por e njohur që në fillim të viteve 90, Rudina Magjistari. Marrëdhëniet e tyre përfunduan pa vënë kurorë në fund të vitit 2006.

Marrëdhëniet e Edi Ramës me Lindita Bashën (Xhillari) kanë filluar në mes të viteve 2000 kur ajo ishte ende e martuar. Imazhi i tyre i vetëm në shtyp ishte një foto që kaloi pa rënë shumë në sy në revistën Klan në gusht të vitit 2005 kur Lindita Basha dhe Edi Rama me partnerët e tyre drekonin së bashku në restorant Millenium në Pogradec gjatë kthimit nga Korça. Fotoja u konsiderua rutinë dhe historia e tyre mbeti gjithnjë e panjohur ose në pritje të divorcit zyrtar të Bashës me të shoqin. Edi Rama dhe Lindita Basha u martuan më 19 tetor 2010.

Libra

Tjetër

Referencat

  1. ^ KQZ Rezultatet e Zgjedhjeve Vendore 2003
  2. ^ World Mayor
  3. ^ KQZ Rezultatet e Zgjedhjeve Vendore 2011
  4. ^ Top Channel
  5. ^ [ http://www.gazeta-shqip.com/politike/c4df81d8118d8ec637841b5cf3653927.html Gazeta Shqip]
  6. ^ Raporti Përfundimtar, Faqe 2 (15 gusht 2011)
  7. ^ Raporti Përfundimtar, Faqe 28 (15 gusht 2011)]
  8. ^ [ http://www.top-channel.tv/artikull.php?id=211367 Top Channel]


Lidhje të jashtme

Commons-logo.svg         Wikimedia Commons ka materiale multimediale në lidhje me: Category:Edi Rama