Flamuri i Sllovenisë

Flamuri i Sllovenisë

Flamuri i Sllovenisë (Sllovenisht: zastava Slovenije) përbëhet nga tri vija horizontale të barabarta me ngjyrë të bardhë (sipër), të kaltër, dhe të kuqe, me stemën kombëtare në pjesën e djathtë të flamurit, në vijën e bardhë dhe të kaltër. Stema është një mburojë me figurën e malit Triglav, maja më e lartë në Slloveni, në të bardhë me një prapavijë të kaltër; poshtë saj janë dy vija të lakuara të kaltra që e pasqyrojnë Detin Adriatik dhe lumenjtë lokal, dhe mbi të janë tre yje ngjyrë ari me gjashtë maje të renditura në një trekëndësh të cilat janë marrë nga stema e Kontëve të Celjes, dinastia e madhe sllovene e shekullit të 14-të dhe 15-të.

Ngjyrat e flamurit slloven konsiderohen pan-sllave, por në fakt ato vijnë nga stema mesjetare e Dukatit të Karniolës, e përbërë nga 3 yje, një mal dhe tre ngjyra (e kuqe, blu, e verdhë), gjysmëhënë. Trengjyrëshi ekzistues slloven u ngrit për herë të parë në histori gjatë Revolucionit të vitit 1848 nga aktivisti dhe poeti nacionalist romantik slloven Lovro Toman më 7 prill 1848, në Lubjanë, në përgjigje të një flamuri gjerman që u ngrit në majë të Kështjellës së Lubjanës. Ngjyra dhe dizajne të ngjashme përbëjnë flamuj të tjerë sllavë, veçanërisht flamurin e Sllovakisë.