Bubaveci

Bubaveci
Bubaveci
Fshat
Shteti	Kosova
Komuna	Malisheva
Rajoni	Prizren
Sipërfaqja
• Gjithsej	9,9 km2 (38 sq mi)
Lartësia mbidetare	584 m (1,916 ft)
Popullsia
• Gjithsej	1.868 banorë
Targat	04

Bubaveci është një vendbanim në komunën e Malishevës, Kosovë. Shtrihet rreth 12 kilometra në pjesën veriperëndimore të komunës së Malishevës. Është kryesisht vendbanim fushor.^[1]

Fshati ka shkollën nëntëvjeçare, xhaminë, një pompë të benzinës dhe disa objekte shërbyese dhe zejtare. Nga ky fshat ka qenë biznesmeni Latif Kryeziu, i cili ka qenë pronar i qindra pikave të Shell Kosova. Pas vdekjes së tij, edhe i biri që trashëgoi pronën e të atit, bëri vetëvrasje më 2023.^[2]

Historia

Në disa lokalitete të këtij fshati janë gjetur gjurmë të lashtësisë. Te vendi që quhet Kodra e Xhamisë janë gjetur disa heshta, shtiza, një mburojë e luftës, dhe katër varreza që mendohet të jenë të periudhës iliro-romake. Si katund vllah me emrin Bobojevci, përmendet në kartën e Mbretit Milutin të vitit 1314, dhënë Manastirit të Banjskës dhe thuhet aty se fshati kishte 38 shtëpi. Në defterin kadastral të Sanxhakut të Shkodrës të vitit 1485 është i regjistruar si vendbanim me emrin Boboluça.

Në një hartë austriake, të hartuar në bazë të shënimeve të vitit 1689, është i regjistruar si vendbanim me emrin Babovci. Më vonë përmendet edhe në regjistrin e Manastirit të Deviçit në vitin 1766 deri 1780. Është i regjistruar me shënimet përkatëse edhe në sallnamet e Vilajetit të Kosovës të viteve 1893, 1896 dhe 1900.

Pas dëbimit të shqiptarëve nga Sanxhaku i Nishit, në vitin 1877-78, në këtë vendbanim janë vendosur dy vëllazëri shqiptare muhaxhire: Dragushët dhe Dragollukët me disa shtëpi dhe më vonë, edhe Dragidellët nga fshati Drenoc i Komunës së Klinës. Nga pushtuesi serb, më 1912, janë djegur dy shtëpi dhe janë vrarë disa persona të këtij fshati. Në këtë vit është shpërngulur një familje në Turqi. Më 1934 dhe më 1936 janë vendosur këtu 14 familje optane sllave, të ardhura nga Shqipëria dhe një familje nga Serbia. Kolonët u vendosën kryesisht në vendin Della.

Lagjet dhe mikrotoponimet

Lagjet kryesore në fshatin Bubavec janë: Kryeziu, Bajdonët, Zogianët, Bashotët dhe Muhaxhirët. Mikrotoponimet më karakteristike janë: Luburja, Te Kisha, Kodra e Xhamisë, Arat e Lisit, Seishtat, Arat e Kodrës, Arat e Llukshiqit, Rudina, Kvaçabregu, Dardhishta, Pinavoda, Krushat, Rrahishta, Rrezet Tona, Lugi Livadica, Kukat, Livadhet e Buta, Dellat, dhe Agraxhat.

Demografia

Popullsia sipas viteve
Viti i regjistrimit	Numri i banorëve	Numri i shtëpive
1905	-	22
1918	317	31
1921	363	35
1948	543	69
1961	628	75
1971	822	79
1981	1122	94
1999	1868	294

Koha e Luftës së Kosovës

Gjatë Luftës së Kosovës, në periudhën 1998-99, janë djegur 291 objekte banimi dhe disa objekte të tjera ndihmëse e ekonomike. Shkolla fillore e fshatit është djegur dy herë me gjithë dokumentacionin arkivor dhe me bibliotekën me 2500 ekzemplarë, janë djegur 7 biblioteka private me rreth 12500 ekzemplarë, pastaj është djegur xhamia, hangarët e OP "Mirusha", dokumentacioni i Kooperativës Bujqësore, etj.. Janë vrarë 8 persona dhe tre të tjerë janë zhdukur. Më 24 mars 1999 është zbrazur fshati. Më shumë se gjysma e tij ka mbetur maleve, ndërsa pjesa tjetër kanë dalë në Shqipëri e në Maqedoni.

Shiko edhe

Lista e ardhacakëve - Malishevë

Referime

^ Osmani, Jusuf (2006). Vendbanimet e Kosovës - Malisheva. Vëll. 19. Prishtinë: Shkrola. fq. 89. ISBN 9951-8658-3-6.
^ "I jep fund jetës djali i Latif Kryeziut". 2 nëntor 2023. Marrë më 2024-02-12.

Lidhje të jashtme

vendndodhja

Komuna e Malishevës

Qyteza: Malisheva dhe fshatrat:

[:0-1] Osmani, Jusuf (2006). Vendbanimet e Kosovës - Malisheva. Vëll. 19. Prishtinë: Shkrola. fq. 89. ISBN 9951-8658-3-6.

[2] "I jep fund jetës djali i Latif Kryeziut". 2 nëntor 2023. Marrë më 2024-02-12.

[1]

[2]